ޗައިނާއިން އިނގިރޭސިވިލާތުގެ ޕައިލެޓުން ތަމްރީން ކުރުމަށް ހުރަސް އަޅައިފި
ޗައިނާ ސިފައިން ތަމްރީނު ކުރުމަށް އިނގިރޭސި ވިލާތުގެ އަސްކަރީ ޕައިލެޓުން ގެނައުމަށް ޗައިނާއިން މަސައްކަތް ކުރަމުންދާތީ އެކަން ހުއްޓުވުމަށް ފިޔަވަޅުތައް އަޅަމުން އަންނަ ކަމަށް އިނގިރޭސި ސަރުކާރުން ބުނެފިއެވެ.
ބީބީސީން އަންގާރަ ދުވަހު ރިޕޯޓްކޮށްފައިވާ ގޮތުގައި ޗައިނާގެ ޕީޕަލްސް ލިބަރޭޝަން އާމީގެ މެމްބަރުން ތަމްރީނު ކުރުމަށް ކުރީގެ 30 ވަރަކަށް އަސްކަރީ ޕައިލެޓުން ދިޔައެވެ.
"ޕީޕަލްސް ރިޕަބްލިކް އޮފް ޗައިނާގައި ޕީޕަލްސް ލިބަރޭޝަން އާމީގެ ސިފައިން ތަމްރީނު ކުރުމަށް ޓަކައި އިނގިރޭސިވިލާތުގެ އަސްކަރިއްޔާގެ ކުރީގެ ޕައިލެޓުންނަށް އެހީތެރިކަން ފޯރުކޮށްދިނުމަށް ޗައިނާގެ ރެކްރޫޓްމަންޓް ސްކީމްތައް ހުއްޓުވުމަށް ޓަކައި އަޅުގަނޑުމެން ދަނީ ވަރަށް ވަރުގަދަ ފިޔަވަޅުތަކެއް އަޅަމުން،" ޑިފެންސް މިނިސްޓްރީގެ ތަރުޖަމާނު ވިދާޅުވެފައިވެއެވެ.
ސިފައިންގެ ވަޒީރު ޖޭމްސް ހީޕީ ސްކައި ނިއުސް އަށް ވިދާޅުވީ މިފަދަ މީހުން ރެކްރޫޓް ކުރުމަކީ ޑިފެންސް މިނިސްޓްރީގެ ތެރޭގައި "އެތައް އަހަރެއް ވަންދެން" އޮތް ކަންބޮޑުވުމެއް ކަމަށާއި އިނގިރޭސި ކައުންޓާ އިންޓެލިޖެންސުން އެކަން ވަރަށް ގާތުން ބަލަމުން އަންނަ ކަމަށެވެ.
"ޗައިނާއަކީ ދުނިޔޭގެ ގިނަ ތަންތަނުގައި އިނގިރޭސިވިލާތުގެ މަސްލަހަތަށް ނުރައްކާވާ ވާދަވެރި ގައުމެއް. އަދި ހަމައެހެންމެ އެއީ ވެސް ވިޔަފާރީގެ މުހިންމު ބައިވެރިއެއް،" އޭނާ ވިދާޅުވި އެވެ.
"އެކަމަކު އަޅުގަނޑުމެންގެ ސިއްރުތަކަށް ވަނުމަށް އެމީހުން ކުރާ މަސައްކަތް ކުރޭ. އަޅުގަނޑުމެންގެ ވައިގެ ސިފައިންގެ ގާބިލްކަން ދެނެގަތުމަށް ޕައިލެޓުން ހޯދުމަކީ ވަރަށް ސާފުކޮށް އަޅުގަނޑުމެންނަށް އޮތް ކަންބޮޑުވުމެއް."
ހެއްޕޭ ވިދާޅުވީ ތަމްރީނުތަކުގައި ބައިވެރިވާ ފަރާތްތަކުގެ ގާތަށް ގޮސް ހުއްޓާލަން އަންގާފައިވާ ކަމަށާއި ސަރުކާރުން ގާނޫނެއް ހަދަމުން އަންނަ ކަމަށާއި އޭގެ މާނައަކީ އެ އިންޒާރު ރައްޔިތުންނަށް ލިބުމުން އެކަން ކުރިއަށް ގެންދިއުމަކީ ކުށެއް ކަމަށެވެ.
