ފައްޔާޒުގެ ސުވާލެއް ޝަރީފް އާއި ނަޝީދަށް: ފޯޅަވަހި ގެއްލިގެން ދިޔައިރު ކުރެއްވީ ކޮންކަމެއް؟

ޗާގޯސް މައްސަލާގައި ކުރީގެ ރައީސް މުހައްމަދު ނަޝީދާއި ކުރީގެ ޑިފެންސް މިނިސްޓަރ އާދަމް ޝަރީފް ކުރެއްވީ ކޮންކަމެއްތޯ އިކޮނޮމިކް މިނިސްޓަރ ފައްޔާޒް އިސްމާއިލް ސުވާލު ކުރައްވައިފިއެވެ.

Ads by Hajj Corporation

ރާއްޖެއާއި މޮރިޝަސްއާ ދެމެދު އޮތް ފުށުއަރާ ކަނޑުގެ ސަރަހައްދުގެ މައްސަލަ ހޫނުވެފައިވާ މި ދަނޑިވަޅުގައި ފައްޔާޒު ކުރެއްވި ޓްވީޓެއްގައި ވަނީ ފޯޅަވައްސަކީ ރާއްޖޭގެ ބަޔެއްކަމަށް ދެކިލައްވާނަމަ 2011 ވަނަ އަހަރު މޮރިޝަސްއާ ފޯޅަވައްސާއި ރާއްޖެއާއި ދެމެދު އިންވަކިކުރުމަށް އެއްބަސްވެލެއްވީ ކީއްވެތޯ ރައީސް ނަޝީދާ ސުވާލުކުރައްވައިފައެވެ.

ފައްޔާޒު ކުރެއްވި އެހެން ޓްވީޓެއްގައި 2017 ގައި އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)ގައި މޮރިޝަސްއަށް ފޯޅަވަހި ދޭން ނިންމި އިރު އޭރުގެ ސަރުކާރުން އެކަމާއި ދެކޮޅަށް ދައުވާކުރައްވާފައި ނުވާނީ ކީއްވެތޯ ޝަރީފް އާ ވަނީ ސުވާލު ކުރައްވައިފައެވެ.

“އޭރުގެ ޑިފންސް މިނިސްޓަރ ކީއްބާ ކުރެއްވީ ފޯޅަވެހި ރާއްޖޭގެ ތަނެއް ކަމަށްދެކި ގެއްލި ދިޔައިރު” ފައްޔާޒު ވިދާޅުވިއެވެ.

ފައްޔާޒު މިފަދައިން ވިދާޅުވެފައިވާ އިރު މި މައްސަލައާ ގުޅިގެން ރައީސް ނަޝީދު މިއަދު ވިދާޅުވީ މިވަގުތު ފޯޅަވަހި އަކީ އެއްވެސް ގައުމެއްގެ ތަނެއް ނޫންކަމަށެވެ. އަދި އިންގިރޭސިން އެތަން ބެލެހެއްޓި ނަމަވެސް އެ ތަނަކީ ރާއްޖޭގެ ތަނެއް ނޫންކަމަށް ބުނެވޭނެ ޖާގައެއް ނެތްކަމަށެވެ. އަދި އެއީ ޗާގޯސް އަތޮޅު ތަކުގެ ތެރެއިން އަތޮޅެއްކަމަށެވެ. އަދި އެތަނަށް ޔޫރަޕު މީހުން ކިޔަނީ ޕެރޮސް ބަނޯސް ކަމަަށް ރައީސް ނަޝީދު ފާހަގަކުރެއްވިއެވެ.

އޭޖީ އޮފީހުން ބުނާ ގޮތުން, ރާއްޖެއާއި މޮރިޝަސްއާ ދެމެދު އޮތް ފުށުއަރާ ކަނޑުގެ ސަރަހައްދުގެ މައްސަލަ ދެގައުމުން ބައިވެރިވެފައިވާ ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީ (އަންކްލޮސް)ގެ އުސޫލުތަކާ އެއްގޮތަށް ކަނޑައެޅުމަކީ ރާއްޖޭގެ ބައުންޑަރީ ބައިނަލްއަގުވާމީ ހަމަތަކުގެ މަތިން ކަނޑައެޅިގެން ދިއުމެވެ.

އަދި އަންކްލޮސްއަކީ ރާއްޖެއިން ސޮއިކޮށްފައިވާ މުއާހަދާއެއް ކަމަށްވާއިރު, ރާއްޖޭގެ ގާނޫނުއަސާސީއާއި ގާނޫނާ އެއްގޮތްވާ ގޮތުގެ މަތިން އެ މުއާހަދާއާ އެއްގޮތަށް ރާއްޖެއިން އަމަލުކުރަންޖެހޭނެ ކަމަށް ބުންޏެވެ.