ނޮވެމްބަރު 15ގެ ފަހުން ޕާޓީތަކަށް މެންބަރުން ވެއްދޭނީ އާ ފޯމުގައި
އޮޅުވާލައިގެން ސިޔާސީ ޕާޓީތަކަށް މެންބަރުން ވެއްދުމާއި، ޕާޓީތަކުގެ މެންބަރުން އެއްޕާޓީން އަނެއް ޕާޓީއަށް ނޭނގި ބަދަލުކުރުމުގެ މައްސަލަ ހައްލުކުރުމުގެގޮތުން، ފޯމުތަކަށް ގެނައި ބަދަލަށް މިމަހުގެ 15 އިން ފެށިގެން ޢަމަލުކުރަން ފަށާނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އިލެކްޝަން ކޮމިޝަނުން ވިދާޅުވީ ތިން ފޯމަކަށް ބަދަލު ގެނެސްފައިވާ ކަމަށެވެ. އޭގެ ތެރޭގައި ހިމެނެނީ އަލަށް އުފެއްދުމަށް އެދި ހުށަހަޅާ ޕާޓީގެ މެމްބަރުކަމަށް ވުމަށް އެދޭ ފޯމު، މެމްބަރުކަމަށް ވުމަށް އެދޭ ފޯމު އަދި ސިޔާސީ ޕާޓީތަކުގެ ދަފްތަރަށް ޝަކުވާ ހުށަހަޅާ ފޯމެވެ.
އަލަށް އެކުލަވާލި ފޯމުތަކަށް ގެނައި އެންމެ ބޮޑު އެއް ބަދަލަކީ ހެކިންގެ ފިންގާ ޕްރިންޓްވެސް ޖަހަން ޖެހެއެވެ. މިހާރު ސިޔާސީ ޕާޓިތަކަށް މެންބަރުން ވެއްދުމުގައި ހެކިންގެ ގިންގަރ ޕްރިންޓު ޖަހާކަށް ނުޖެއެވެ.
އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ފޯމަށް ބަދަލު ގެނެސްފައިވަނީ ސިޔާސީ ޕާޓީތަކާއި މަޝްވަރާ ކުރުމަށްފަހުގައިކަމަށެވެ.
