ބާއްޖަވެރި ދިރިއުޅުމެއް ބޭނުންވާ ނަމަ އީމާންކަމާ, ކިޔަމަންތެރިކަން އަދާކުރަން ޖެހޭ: ޚުތުބާ
ބާއްޖަވެރި ދިރިއުޅުމެއް ބޭނުންވާ ނަމަ އީމާންކަމާ, ކިޔަމަންތެރިކަން އަދާކުރުމަށް އަވަސްވެގަތުމަށް ޚުކުރު ޚުތުބާގައި ބުނެފިއެވެ.
މިއަދުގެ ހުކުރު ޚުތުބާގައި އަލިއަޅުވާލައިފައިވާ މައުޟޫއު އަކީ "ހަގީގީ ބާއްޖަވެރިކަން" މިއެވެ.
ޚުތުބާގައި ބުނެފައި ވަނީ ދުނިޔޭގައި ކޮންމެ މީހަކުވެސް އެންމެ ބޮޑަށް މަަސައްކަތް ކުރާނީ އުފާވެރި, ބާއްޖަވެރި, ދިރިއުޅުމެއް ހޯދުމަށް ކަމަށެވެ. އަދި އުފާވެރިކަމާއި ބާއްޖަވެރިކަމަކީ އަގު ދީފައި ގަނެވޭނެ އެއްޗެއް ކަމުގައިވީ ނަމަ އެކަން ކުރާނެ ކަމަށާއި މީސްތަކުންގެ ޚިޔާލާއި ފިކުރު ތަފާތުވެފައިވާ ފަދައިން ބާއްޖަވެރިކަން މާނަކުރުމުގައިވެސް މީހުންގެ ވިސްނުން ތަފާތުވެފައިވާ ކަމަށެވެ.
އަދި އެއްބަޔަކު ދެކޭ ގޮތުގައި ބާއްޖަވެރިކަމަކީ މުއްސަނދިކަން ކަމަށާއި މުދާވެރިވުމަކީ ހަމައެކަނި ބާއްޖަވެރިކަމެއް ކަމުގައިވީ ނަމަ ގަރޫނަކީ އެންމެ ބޮޑު ބާއްޖަވެރިޔާއަކަށް ވާނެތޯ ހުތުބާގައި ސުވާލުކުރަވާފައިވެއެވެ. ހަގީގީ ބާއްޖަވެރިކަމަކީ މާތްاللهއަށް އީމާންވެ, އެކަލާންގެ ނަހީކުރެއްވި ކަންކަމާ ދުރުހެލިވުން ކަމަށް ބުނެފައިވެއެވެ.
"މިއަދު ކޮންމެ މީހަކުވެސް ގަދައަޅާއި, ބުރަ މަސައްކަތް ކުރަނީ, އުފާވެރި, ހިތްހަމަޖެހޭ ދިރިއުޅުމެއް ހީދުމަށެވެ. އެގޮތުން އެކިއެކި ކަންކަމުގައި އަވަދިނެތި މަޝްއޫލުވެ އުޅެއެވެ. އަދި ބާއްޖަވެރިކަން ދެއްވުމަށް ވަޢުދުވެވޮޑިގެންނެވި ކަލާންގެއަށް ހަނދުމަކުރުމަށްވެސް ހަނދާނެއް ނުހުރެއެވެ. އެ ކަލާންގެ އެންމެ ބޮޑަށް ލޯބިވާ ނަމާދު މަތިންވެސް ހަނދާން ނުހުރެއެވެ" ހުތުބާގައި ބުނެފައިވެއެވެ.
ހަގީގީ ބާއްޖަވެރިކަން އޭގެ މައްޗަށް ބީނާވެގެންވާ ދެ އަސާސްކަމުގައިވާ އީމާންކަމާއި ކިޔަމަންތެރިކަމުގައި ހިފައިގެން ކުރިޔަށް ދިޔުމަށް ހުތުބާގައި ނަސޭހަތްތެރިވެފައިވެއެވެ.
