ތިން އަހަރު ތެރޭގައި ބޮޑު ތިލަދުންމަތީގައި 6 ރިސޯޓް ހުޅުވޭނެ: މައުޞޫމް
ކުރިއަށް އޮތް 3 އަހަރުތެރޭ ބޮޑު ތިލަދުންމަތީގައި އިތުރު 6 ރިސޯޓު ހުޅުވޭނެ ކަމަށް ޓޫރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މައުޞޫމް މިހެން ވިދާޅުވެފައިވަނީ، މިއަދުގެ ރައްޔިތުންގެ މަޖިލީހުގެ ޖަލްސާގައި މެންބަރުން ސުވާލު ކުރަން ހުޅުވާލި ފުރުސަތުގައި، ކުޅުދުއްދުށި އުތުރު ދާއިރާގެ މެންބަރު ޔާސިރު ޢަބްދުއްލަތީފު ކުރެއްވި ސުވާލަކަށް ޖަވާބުދެއްވަމުންނެވެ.
"3 އަހަަރުތެރޭ އިތުރު 4 ރިސޯޓެއް އޮޕަރޭޝަނަށް އަންނާނެ، އެއީ ހއ. ބެރިންމަދޫ، ށ. ހުރަސްފަރު، މާއިންފަރު އަދި ކަބާލިފަރު، މީގެއިތުރުން ޓޫރިސްޓު ހޮޓާތައް ތަރައްޤީކުރުމުގެ މަސައްކަތް ހއ. ކެލާ، ހއ. އުތީމް، އަދި ހއ، ވަށަވަރުގައި ކުރިއަށްގެންދާ ހޮޓާ ރިސޯޓު ނިމި 404 އެނދު ތައާރަފްކުރެވޭނެ ކަމަށް ބެލެވޭ،" މިނިސްޓަރ މައުސޫމް ވިދާޅުވިއެވެ.
ބޮޑު ތިލަދުންމަތީގައި ޓޫރިޒަމްގެ ވައުުދުވެ، ސަރުކާރުތަކުން އެކަން ނުފުއްދާތީ، މިނިސްޓަރު މައުސޫމް އެރަށަށް ކުރެއްވި ދަތުރުފުޅެއްގައި އެރަށުގައި ވަނީ މުޒާހަރާކޮށްފައެވެ.
މިނިސްޓަރ ވިދާޅުވީ ހދ. ހަނިމާދޫ އިންޓަރނޭޝަނަލް އެއަރޕޯޓް ތަރައްޤީކުރެވިގެންދާއިރު އެސަރަހައްދުގައި ފަތުރުވެރިކަމަށް އެކަށީގެންވާ މިންވަރަށް އެނދުތައް ހުންނާނެ ކަމަށެވެ. އެގޮތުން ފުުރަތަމަ އަހަރުތެރޭ ކޮންމެ ދުވަހަކު އެއެއަރޕޯޓު މެދުވެރިކޮށް ދުވާލެއްގެ މައްޗަށް 300 ފަތުރުވެރިން އަންނާނެ ކަމަށް ލަފާކުރެވޭއިރު، ބެޑް ކެޕޭސިޓީ އެމިންވަރަށް އެބަހުރި ކަމަށެވެ.
މިނިސްޓަރ ވިދާޅުވީ ބެޑު ކެޕޭސިޓީގެ އިތުރަށްވެސް ފަތުރުވެރިކަން ކުރިއަރައިގެން ދިޔުމަށް ބޭނުންވާނެ އެހެން ވަސީލަތްތައްވެސް ތަރައްޤީކުރުން މުހިންމު ކަމަށެވެ. އެގޮތުން ފެނާއި ނަރުދަމާ އާއި އިންޓަރނެޓުގެ ޚިދުމަތާއި، ރެސްޓޯރެންޓު ފަދަ ޚިދުމަތްތައް ހުރުން މުހިއްމުކަމަށް މިނިސްޓަރ ވިދާޅުވިއެވެ.
