ޗާގޯސް މައްސަލަ: ވެރިކަމަށް އައިސް މި ސަރުކާރުގެ ނިންމުން ''ހަމަ ބޮލާލައި ޖަހާނަން''
ޗާގޯސް މައްސަލައިގައި މި ސަރުކާރުން ނިންމި ނިންމުމަށް އިހުތިރާމު ނުކުރައްވާާނެ ކަމަށާއި, ކިތަންމެ ކޯފާވިޔަސް ''ހަމަ ބޮލާލައި ޖަހާނެކަމަށް'' ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމް މިރޭ ވިދާޅުވެއްޖެއެވެ.
ރާއްޖޭގެ ޚާއްސަ އިގުތިސާދީ ކަނޑުގެ ސަރަހައްދާއި ޗާގޯސްގެ ކަނޑުގެ ސަރަހައްދުގައި ފުށުއެރުންތަކެއް ހުރިކަމަށް ބުނެ ބައިނަލްއަގްވާމީ ޓްރައިބިއުނަލަށް މޮރިޝަސްގެ ފަރާތުން ވަނީ ރާއްޖެއާ ދެކޮޅަށް މައްސަލައެއް ހުށަހަޅައިފައެވެ. އެ މައްސަލައިގައި މި މަހުގެ 20 ވަނަ ދުވަހު ބައިނަލްއަގްވާމީ ޓްރައިބިއުނަލުގައި ކުރިއަށްދިޔަ އަޑުއެހުމުގައި އެޓާނީ ޖެނެރަލް އިބްރާހިމް ރިފްޢަތު ވަނީ, މޮރިޝަސްއަށް ޗާގޯސްގެ ސިޔާދަތީ ބާރު ލިބިގެންވާކަމަށް ރާއްޖެއިން ގަބޫލުކޮށް, މިދިޔަ އޮގަސްޓު 22 ގައި މޮރިޝަސްގެ ބޮޑުވަޒީރަށް ރައީސް ޞާލިޙް ސިޓީއެއް ފޮނުއްވާފައިވާކަމަށް ވިދާޅުވެފައެވެ.
ޕީޕިއެމްއިން މިރޭ ބޭއްވި ޖަލްސާގައި ރައީސް ޔާމީން ވިދާޅުވީ ރައީސް ޞާލިޙް އެ ސިޓީ ފޮނުއްވީ ޤާނޫނުއަސާސީއާ ޚިލާފަށް ކަމަށާއި, ސިޓީ ފޮނުއްވީ މުޅި ރައްޔިތުންގެ މަޖިލިސްގެ އިމްތިޔާޒަށް ''އަރައިގެންފައި'' ކަމަށެވެ. އަދި އެއީ ދިވެހިންގެ ޙައްޤު ގެއްލޭ ގޮތަށް ފޮނުއްވާފައިވާ ސިޓީއެއް ކަމަށެވެ.
''ﷲ ގެ ރަޙްމަތާއެކީ 2023 ވަނަ އަހަރަކީ ދިވެހި ރައްޔިތުންގެ އަހަރެއް ކަމަށްވަންޏާ އަޅުގަނޑުމެނަށް ސަރުކާރު ލިބިއްޖެކަމަށްވަންޏާ ޤާނޫނާއި ޚިލާފަށް ޤާނޫނުއަސާސީއާ ޚިލާފަށް މިހާރު ސަރުކާރުން މި މައްސަލައިގަ ކޮށްގެން އުޅޭ ކަންތައް އަޅުގަނޑު އިޙްތިރާމެއް ނުކުރާނަން. އެކަން އަނބުރާ ޖަހާނަން. އެއް ގޮތަކަށް ވެސް އަޅުގަނޑު ކުރިން ވެސް ދަންނަވަމުން ދިޔަ ފަދައިން މި ސަރުކާރުން ޤާނޫނާ ޚިލާފަށް ކުރާ ކަންތައްތަކަށް އިޙުތިރާމެއް ނުކުރާނަން އަޅުގަނޑުމެންގެ ސަރުކާރަކުންނެެއް. އަޅުގަނޑުމެންގެ ސަރުކާރަކުން އެއްގޮތަކަށް ވެސް އެކަން ގަބޫލުކޮށްގެން ނުތިބޭނަން. އަޅުގަނޑުމެން ދެން ކުރާ ޕްލޭންތައް ކުރާން ފަށާނަން.''
ރައީސް ޔާމީން ވިދާޅުވީ ''އަޅުގަނޑުމެން މާޔޫސްއެއްނުވާ'' ކަމަށާއި, ނަމަވެސް މައްސަލަ މި ގޮތަށް ނިންމުމުން ''ރުޅި އަންނަ'' ކަމަށެވެ. އަދި އެއީ ވަރަށް ޒިންމާދާރުކަން ކުޑަކޮށް ކުރި ކަމެއް ކަމަށާއި, އެންމެ މަތީ ދަރަޖައިން މި ސަރުކާރުން ވަނީ ޣައްދާރުވެފައިކަމަށް ވެސް ރައީސް ޔާމީން ވިދާޅުވިއެވެ.
''މި އެގްރިމަންޓެއް އަޅުގަނޑުމެން ބަލައެއް ނުގަންނާާނަން. ރައީސުލްޖުމްހޫރިއްޔާކަމުގަ ހުރެގެން އެ ފޮނުވި ސިޓީ އެއީކީ ފޮނުވޭނެ ސިޓީއެއް ނޫން. އެ ސިޓީއަށް އޮނަރ ކުރާކަށް ވެސް ނުޖެހޭނެ. އެއީ ޤާނޫނާޚިލާފަށް އޮންނަ އުސޫލުތަކާ ޚިލާފަށް
ރައީސުލްޖުމްހޫރިއްޔާ ފޮނުވާ ސިޓީއަކަށް އޮނަރ އެއް ނުކުރެވޭނެ. ޖީއެމްއާރް އެގްރިމަންޓަށް ވީ ގޮތް ވާނީ. ބަދަލު ދޭންޖެހިދާނެ އެކަމު އޮނަރ އެއް ނުކުރާނެ. ޖީއެމްއާރަށް ވެސް ވީ ގޮތަކީ މަޖިލީހުން އެ ބަލައިނުގެން އެކަން ނިންމާފަ އޮއްވާ ރައީސުލްޖުމްހޫރިއްޔާ ސޮއިކޮށްފަ އެ މީހުންނާ ހަވާާލުކުރީ.''
''ހަމަ ބޮލާލާ ޖަހާނީ. ކިތަންމެ ކޯފާވިޔަސް.'' ރައީސް ޔާމީން އިތުރަށް ވިދާޅުވިއެވެ.
ރައީސް ޞާލިޙް މޮރިޝަސްގެ ބޮޑުވަޒީރަށް ފޮނުއްވި ސިޓީ މަޖިލީހުގެ ކަމާބެހޭ ކޮމިޓީއަށް ގެނެސް, އެ މައްސަލަ ބަލައިދިނުމަށް މަހިބަދޫ ދާއިރާގެ މެންބަރު އަޙްމަދު ޠާރިޤް ވަނީ މައްސަލަ ވެސް ހުށަހަޅުއްވައިފައެވެ.
މި ބުނީ ރައީސް ޔާމީނުވެސް ކެބިނެޓްގަ އިންނެވި އިރުގަ ދޯ ހަމަ މި މުނައްވަރުމެން ޗާގޯސް މައްސަލައިގަ ލަފާވެސް ދެއްވީ، ދެން މި ހިތަށް އަރަނީ ކީއްވެބާއޭ ޗާގޯސް ރާއްޖޭގެ ތަނެއްގެ ގޮތުގައި ކްލައިމް ނުކުރެއްވީކީ! މި މައްސަލައިގެ ދެބަސްވުން ހިނގާތާ މިހާރު 30 އަހަރުވެއްޖެ ކަމަށް ވަނީ، ރައްޔިތުންނަށް ހަމަ އެއްވެސް އެއްޗެއް ނޭނގި މި އޮތްހުރިހާ ދުވަސް މި ދިޔައީ! ހަމަ މުޅިންވެސް ސިޔާސީ މަްންފާ އަށް ކޮންމެ މީހަކުވެސް ވާހަކަ ދައްކަނީ!