ހަސަންގެ ތުހުމަތެއް: ރައީސް ނަޝީދު މަޖިލީހުން ވަކި ކުރަން އުޅެނީ ސަރުކާރުން

ރައީސް މުޙައްމަދު ނަޝީދު މަޖިލީހުގެ މެންބަރު ކަމުން ވަކިކޮށްދިނުމަށް އެދި ސްޕްރީމް ކޯޓަށް ހުށަހެޅި މައްސަލައިގެ އަޑީގައި ތިބީ ސަރުކާރުން ކަމަށް އެމްޑީޕީގެ ކުރީގެ ޗެއަރޕާސަން ހަސަން ލަތީފް ތުހުމަތު ކުރައްވައިފިއެވެ.

Ads by Hajj Corporation

ކޮޕް27ގައި އެހެން ޤައުމެއް ތަމްސީލް ކުރައްވާތީ، ރައީސް ނަޝީދުގެ މި އަމަލަކީ ޤާނޫނު އަސާސީގައި ބަޔާންކޮށްފައިވާ މަޖިލީހުގެ މެންބަރެއްގެ ޒިންމާތަކާއި ޝަރުތުތަކާ ޚިލާފު އަމަލެއް ކަމަށްބުނެ ސްޕްރީމް ކޯޓަށް މިއަދު ވަނީ މައްސަލައެއް ހުށަހަޅުއްވާފައެވެ. މި މައްސަލައި ބަލައިގަތުމާއި މެދު މިހާތަނަށް ކޯޓުން ވަކި ގޮތެއް ހާމަކޮށްފައެއް ނުވެއެވެ.

ސްޕްރީމް ކޯޓަށް ދުސްތޫރީ މައްސަލައެއްގެ ގޮތުގައި މި މައްސަލަ ހުށަހެޅުއްވި ޚަބަރު ޓްވީޓް ކުރައްވާ ހަސަން ވިދާޅުވީ، ސްޕްރީމް ކޯޓުން މިކަން ކުރަން ނިންމީ، މަޖިލީހުގެ ރައީސް ކަމުން، ރައީސް ނަޝީދު ވަކިކުރަން މަޖިލީހުން ބޭނުންވާ ވަރަށް ވޯޓް ނުލިބުމުން ކަމަށެވެ.

ހަސަންގެ މި ޓްވީޓް، ރައީސް ނަޝީދުގެ ރަސްމީ ޓްވިޓަރ އެކައުންޓުން ވަނީ ރީ-ޓްވީޓް ކުރައްވާފައެވެ.

ހަސަން އިތުރަށް ވިދާޅުވީ، އެ މައްސަލައިގައި ޤާނޫނީ އެއްވެސް އަސާސެއް ނެތް ކަމަށެވެ. އަދި މިކަމުގެ އަޑީގައި ތިބީ ސަރުކާރުންކަމަށް ތުހުމަތު ކުރެއްވިއެވެ.

ރައީސް މުޙައްމަދު ނަޝީދުވަނީ، އެމްޑީޕީގެ ރިޔާސީ ޕްރައިމަރީގައި އިބްރާހީމް މުޙައްމަދު ޞާލިޙަށް ތާއީދު ނުކުރައްވާނެކަން ދާދިމިދާކަށް ދުވަހު ވެސް އެމްޑީޕީގެ ވަޓްއަޕް ގުރޫޕެއްގައި ވިދާޅުވެފައެވެ. އެމްޑީޕީގެ ރިޔާސީ ޕްރައިމަރީގައި ރައީސް ނަޝީދު ވެސް ވާދަ ކުރައްވާއިރު، އިންތިޚާބު ބާއްވާ ވަކި ތާރީޚެއް އަދި ކަނޑައަޅާފައެއް ނުވެއެވެ.