ފައްޔާޟް އެންމެ ފުރަތަމަވެސް ކުރެއްވި ކަމަކީ ޕާޓީގެ 39,000 މެންބަރުން ވަކިކުރެއްވުން: އިންތި
އެމްޑީޕީގެ އާ ޗެއާޕާސަން ފައްޔާޟް އިސްމާޢީލް ވަޑައިގަތުމާއެކު ފުރަތަމަ ވެސް ބޭއްވެވި ޤައުމީ މަޖިލީހުގައި ނިންމެވީ ޕާޓީގެ 39,000 ޢާންމު މެންބަރުން ވަކިކުރެއްވުމަށް ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.
ޗެއާޕާސަން އިންތިޚާބުގައި ފައްޔާޟާ ވާދަކުރެއްވި އިންތި ކުލަބު ހައުސްގައި ވާހަކަ ދައްކަވަމުން ވިދާޅުވީ އެ އިންތިޚާބުގައި ވެސް ވޯޓު އޮޅުވައިލަން މަސައްކަތް ކުރި ކަމުގެ ބައިވަރު ހެކިތައް ހުށަހެޅި ކަމަށާއި ނަމަވެސް އެ ކަންކަން ވެސް ނުބަލާ ކަމަށެވެ. އެހެންކަމުން ޕާޓީގެ ރިޔާސީ ޕްރައިމަރީގައި ބޭނުން ކުރާނެ ގޮތްތައް މާ ''ހުތުރުވާނެ'' ކަމަށް އޭނާ ވިދާޅުވިއެވެ.
އަޅުގަނޑުމެންގެ އެތެރޭގެ އިންތިޚާބަކަށް ދާއިރުގަ، މިހާރު ޕްރައިމަރީއަކަށްދާއިރު އެމްޑީޕީގެ 39,000 މީހުން އެއްފަހަރާ ޕާޓީގެ މެންބަރުން ނޫން ގޮތުގަ ކަނޑައަޅައިފި ޤައުމީ މަޖިލީހުން އިހަކަށް ދުވަހު. އާ ޗެއާޕާސަން ވަޑައިގަތުމާއެކު ފުރަތަމަ ބޭއްވި ޤައުމީ މަޖިލީހުގަ ވެސް އެ ކުރެއްވި އެއް ކަމަކީ ކްލޯސް ޑޯ ގަ އިނގޭތޯ މީޑިއާއަށް ވަނުން މަނާކުރެވިފަ އޮތް ބައްދަލުވުމެއްގަ ނިންމެވީ ފުރަތަމަ ވެސް ޕާޓީގެ 39,000 ޢާންމު މެންބަރުން ވަކިކުރުމަށް އިނގޭތޯ.
އޭގެތެރޭގައި ގިނަވާނީ އެމްޑީޕީ އުފެއްދުމުގައި ހަރަކާތްތެރިވި އަދި ޕާޓީ އޭގެ އަސްލު ރޫޙުގައި ދެމި އޮތުމަށް ބޭނުންވާ ކަހަލަ މީހުން ކަމަށް އިންތި ވިދާޅުވިއެވެ.
މި މޭރުމުން ދެއްކެވި ވާހަކައިގައި އިންތި އިތުރަށް ވިދާޅުވީ ޗެއާޕާސަން އިންތިޚާބުގައި މުޅި ދަޢުލަތުގެ ހުރިހާ ބާރެއް ނުފޫޒެއް ބޭނުންކުރި ކަމަށެވެ.
ފަޅު ރަށެއް ކަހަލަ ރަށަކަށް އެރި ނަމަވެސް ވަޒީފާތައް ހުށަހަޅައިލި ގޮތްތަކާއި މިހެން ގޮސް ސަރުކާރުގެ ގިނަ ކުންފުނިތައް އެކީއެކަށް އެ ދުވަސްވަރު ރައްޔިތުންނަށް ޚިދުމަތް ދިނުން ހުއްޓުވައިލާފައި ކެމްޕޭނުގައި އުޅުނު މަންޒަރު އެންމެންގެ ލޯމައްޗަށް ފެނުނު ކަމަށް ވެސް އިންތި ވިދާޅުވިއެވެ.
އެކިއެކި ރަށްރަށަށް ކޮންމެ ރަށަކަށް ވަޑައިގެން އެ ވެވަޑައިގަތް ވަޢުދުތައް އިންތިޚާބުތަކާ ދިމާކޮށް.. ޕާޓީގެ އެތެރޭގެ އިންތިޚާބެއް އެހެން ނަމަވެސް ސަރުކާރުގެ ބާރުވެރިކަން ނާޖާއިޒު ގޮތުގައި ދައުލަތުގެ މުދަލާއި ދައުލަތުގެ ފައިސާއާއި އެކިއެކި ވައްތަރުތަކުގެ ނުފޫޒުތަކުގެ ބޭނުން ހިފައިގެން ހިނގި ކަންކަން އަޅުގަނޑުމެންނަށް ފެނިގެންދިޔައީ.
ރައީސް ނަޝީދަށް ތާއީދު ކުރައްވާ އިންތި ވިދާޅުވިއެވެ.
