މާސްކު ނާޅާ އުޅުނު އިތުރު 62 މީހަކު ޖޫރިމަނާ ކޮށްފި
މަގުމަތީގައި މާސްކު ނާޅާ އުޅުނު 137 މީހަކަށް ނަސޭހަތްދީ، 62 މީހަކު ޖޫރިމަނާ ކޮށްފިއެވެ.
ހެލްތް އިމަޖެންސީ އޮޕަރޭޝަން ސެންޓަރުން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާން ޑރ. ނަޒްލާ ރަފީގު ވިދާޅުވީ، މާލޭ ސަރަޙައްދުގައި އާއްމު ތަންތަނަށް ނުކުންނަށްއިރު މާސްކް އެޅުން މަޖުބޫރުކުރި ފަހުން، އުޞޫލާ ޚިލާފުވެގެން މިހާތަނަށް 1356 މީހަކަށް ފުލުހުން ނަސޭހަތްތެރި ވެފައިވާކަމަށެވެ. އަދި މާސްކް ނާޅާ އާއްމު ތަންތަނަށް ނުކުތް 278 ފަރާތެއް މިހާތަނަށް އައިއިރު ޖޫރިމަނާ ކޮށްފައިވާކަމަށް ޑރ. ނަޒްލާ ވިދާޅުވިއެވެ.
"މާލެ ސަރަހައްދުގައި މާސްކު އެޅުން މަޖުބޫރުކޮށްފައިވާތީ، ފުލުހުން މިދަނީ މާސްކު އަޅަނީ ކިހިނެއްތޯ ބަލާ، އެކަން ތަންފީޒުކުރަމުން. އިއްޔެގެ 6 އިން މިއަދު ހަވީރު 5 އަކަށް 137 މީހަކަށް މިވަނީ ނަސޭޙަތް ދެވިފައި. އަދި 62 މީހަކު ޖޫރިމަނާކޮށްފައިވޭ. މިހާތަނަށް ޖުމްލަ 1356 މީހަކަށް ނަސޭޙަތްދީ، 278 މީހަކު ވަނީ ޖޫރިމަނާކޮށްފައި" ޑރ. ނަޒްލާ ވިދާޅުވިއެވެ.
މާލޭ ސަރަޙައްދުގެ އިތުރުން، އަތޮޅުތަކުން ކޮވިޑް-19ގެ އެކްޓިވް ކޭސްތައް ފެނިފައިވާ ރަށްރަށުގައި އާއްމު ތަންތަނަށް ނުކުމެ އުޅޭއިރު މާސްކް އެޅުން މަޖުބޫރުކޮށްފައި ވީނަމަވެސް، ހުރިހާ ރަށެއްގައިވެސް ކޯވިޑް-19 އާއި ގުޅިގެން ރައްކާތެރިކަމުގެ ގޮތުން އެޗްޕީއޭއިން ދެއްވާ އިރުޝާދުތަކާ އެއްގޮތަށް ޢަމަލުކުރުން މިވަގުތު ވަރަށް މުހިއްމުކަން ޑރ. ނަޒްލާ ވަނީ ފާހަގަކުރައްވާފައެވެ.
Ads by STO
