ބެލްޓް އެންޑް ރޯޑް ފޯރަމް އަނެއްކާ ވެސް ބާއްވަނީ
ތިން ވަނަ ބެލްޓް އެންޑް ރޯޑް ފޯރަމް ފޯ އިންޓަނޭޝަނަލް ކޯޕަރޭޝަން އަންނަ އަހަރު ބޭއްވުމަށް ޗައިނާއިން ވިސްނާނެ ކަމަށް ޗައިނާގެ ރައީސް ޝީ ޖިންޕިން ވިދާޅުވެއްޖެއެވެ.
މިއީ ކޮވިޑް-19އަށްފަހު މި ފޯރަމް ބާއްވާ ފުރަތަމަ ފަހަރުކަން ފާހަގަކޮށްލެވެއެވެ.މީގެ ކުރިން 2017 ވަނަ އަހަރާއި 2019 ވަނަ އަހަރު މި ފޯރަމް ބޭއްވިއެވެ. އެ އަހަރުތަކުގައި ގިނަ ޤައުމުތަކުން ވަނީ ބައިވެރިވެފައެވެ.
ކޮވިޑް-19 ގެ ފަހުން ޗައިނާގެ ބޯޑަރުތައް ބަންދުކޮށް، އެގައުމުން ބާއްވަން ހަމަޖެހިފައިވާ ބައިނަލްއަގްވާމީ ބޮޑެތި އިވެންޓްތައް ވަނީ ކެންސަލްކޮށްފައެވެ.
ޗައިނާއިން ދާދި ފަހުން ވަނީ ކޮވިޑް-19 އާ ދެކޮޅަށް ޗައިނާއިން ގެންގުޅޭ ހަރުކަށި ސިޔާސަތުގެ ބައެއް ކަންތައްތަކަށް ލުއިދޭން ފަށައިފައެވެ.
ޝީ މިހެން ވިދާޅުވީ މިދިޔަ ހުކުރު ދުވަހު ބެންކޮކްގައި ބޭއްވި އޭޝިއާ ޕެސިފިކް އިކޮނޮމިކް ކޯޕަރޭޝަން (އޭޕެކް) ގެ އެއްވުމުގައި ވާހަކަފުޅު ދައްކަވަމުންނެވެ.
