މޫސަ ނަޝީދަށް: ކިންގަކަށް ވާން ބޭނުންފުޅުވާނަމަ، ރީތި ގޮތުގައި ވަޑައިގަންނަވާ
ކިންގަކަށް ނުވަތަ ރަސްގެފާނަކަށް ވެވަޑައިގަންނަވަން ބޭނުންފުޅުވެލައްވާނަމަ، ރީތި ގޮތުގައި ވަޑައިގަތުމަށް އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ) އެ ޕާޓީގެ ރައީސް މުޙައްމަދު ނަޝީދަށް ގޮވައިލައްވައިފިއެވެ.
ދާދިފަހުން އެމްޑީޕީއާ އަލުން ގުޅިވަޑައިގެންނެވި މޫސަ މި ގޮތަށް ގޮވައިލެއްވީ ޕީއެސްއެމްއިން ރޭ ގެނެސްދިން ''ރާއްޖެ މިއަދު'' ޕްރޮގްރާމުގައި ދެއްކެވި ވާހަކައިގައެވެ.
މޫސަ ވިދާޅުވީ އެމްޑީޕީން ކުރިން ވެސް ގަބޫލުކުރި ޕާޓީގެ އެންމެ ވަރުގަދަ ޝަޚުސިއްޔަތަކީ ރައީސް ނަޝީދު ކަމަށާއި އަދިވެސް ޕާޓީގެ އެންމެ ވަރުގަދަ ޝަޚުސިއްޔަތަކީ އެ މަނިކުފާނު ކަމަށެވެ.
ޕާޓީގެ ވަރުގަަދަ ޝަޚުސިއްޔަތެއްގެ ގޮތުގަ އަޅުގަނޑު ރައީސް ނަޝީދަށް އަބަދުވެސް ދަންނަވާ ނަސޭހަތަކީ މަނިކުފާނު ހުންނަވާށޭ އަސްލު ކިންގުމޭކަރުގެ ގޮތުގަ. މައްސަލައެއްނެތޭ ކިންގަކަށްވެ ވަޑައިގަންނަވަންޏާ އޭގެ ރީތި ގޮތުގަ ވަޑައިގަންނަވާށޭ. އެހެން ބަޔަކާ އެކީގަ ނިކުމެވަޑައިގެން އެއްޗެއް ވިދާޅުނުވާށޭ.
މޫސަ ވިދާޅުވީ އެ ވާހަކަ ދަންނަވަން ބޭނުންވެވަޑައިގެންފައި އޮތް ނަމަވެސް ޕާޓީއަށް ވަދެވަޑައިގަތް ފަހުން އަދި ނަޝީދާ ބައްދަލުވާ ގޮތެއް ނުވާ ކަމަށެވެ.
މޫސަ އިތުރަށް ވިދާޅުވީ އެމްޑީޕީ އެއްބައިވަންތަވާންޖެހޭ ކަމަށާއި އެހެން ނޫނީ އެމްޑީޕީއަށް މާ ބޮޑު މުސްތަގުބަލެއް ނެތް ކަމަށެވެ.
އެމްޑީޕީގެ ތެރޭގައި ދެ ފެކްޝަނެއް އުފެދި، އެއް ބަޔަކު ރައީސް ނަޝީދާއެކުގައި ތިއްބެވިއިރު، އަނެއް ބަޔަކު ތިއްބަވަނީ، ޕާޓީގެ އިސް ލީޑަރު، ރައީސް އިބްރާހީމް މުޙައްމަދު ޞާލިޙާއި އެކުގައެވެ. ރީކޯވެސް ހުންނަވަނީ ރައީސްގެ ފަޅީގައެވެ.
