ލަންކާއަށް ކަނޑައަޅުއްވާ ސަފީރަކަށް ފާއިޒް އައްޔަންކުރަން މަޖިލީހުން ރުހުންދީފި
ސްރީލަންކާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރަކަށް މ.މަނާގެ, ޢަލީ ފާއިޒު އައްޔަން ކުރެއްވުމަށް ރައްޔިތުން މަޖިލީހުން މިއަދު ފާސްކޮށްފިއެވެ.
ލަންކާއަށް ރާއްޖެއިން ކަނޑައަޅުއްވާފައި ހުންނަވާ ސަފީރަކަށް ފާއިޒު ހަމަޖެއްސެވުމުގެ މައްސަލަ ޚާރިޖީ ގުޅުންތަކާ ބެހޭ ކޮމިޓީއަށް ފޮނުއްވީ މި މަހުގެ 21 ގައެވެ. އެ މައްސަލަ ދިރާސާ ކުރުމަށްފަހު ކޮމިޓީން ވަނީ ފާއިޒަަށް ރުހުންދީފައެވެ.
ކޮމިޓީގެ ނިންމުމާ އެއްގޮތަށް ރައްޔިތުންގެ މަޖިލީހުގެ މިއަދުގެ ޖަލްސާގައި ފާއިޒަށް ރުހުންދިނީ 62 މެންބަރުންގެ ވޯޓުންނެވެ.
ފުލުހުންގެ ބޯޑުގެ ރައީސްކަމުގައި މިހާރު ހުންނެވި ފާއިޒު ވަނީ ރައްޔިތުން މަޖިލީހުގެ ޚާއްސަ މަޖިލީހުގެ މެންބަރުކަމުގެ މަޤާމު ވެސް އަދާކުރައްވައިފައެވެ.
މީގެއިތުރުން ފާއިޒު ވަނީ ޗީފް އޮފް ޕްރޮޓޮކޯލްގެ މަޤާމާއި މޯލްޑިވްސް އިންޑަސްޓްރިއަލް ފިޝަރީޒް ކަމްޕެނީ ލިމިޓެޑުގެ މެނެޖިންގ ޑިރެކްޓަރުކަމުގެ މަޤާމު ވެސް އަދާކުރައްވައިފައެވެ.
Ads by STO
