ނަޝީދުގެ ބައްޕަ ކެރަފާ ސައްތާރު ގޮވައިގެން ކޯޓަށް ދާނަން: ޝަރީފް
ރައްޔިތުން މަޖިލީހުގެ ރައީސް މުޙައްމަދު ނަޝީދުގެ ބައްޕަ ކެރަފާ ޢަބްދުއްސައްތާރު ގޮވައިގެން ވަރަށް އަވަހަށް ކޯޓަށް ވަޑައިގަންނަވާނެކަމަށް އައްޑޫ ސިޓީ މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.
ޝަރީފް ކުރެއްވި ޓުވީޓެއްގައި ވިދާޅުވީ ނަޝީދުގެ ބައްޕަ އޭނާއަށް ގެއެއް ވިއްކާނަމޭ ބުނެ ފައިސާ ނަގާފައިވާ ކަމަށާއި އެ މައްސަލަ ވަރަށް އަވަހަށް ކޯޓަށް ހުށަހަޅުއްވާނެ ކަމަށެވެ.
ހަސަން ކުރުސީ [ނަޝީދު] ގެ ބައްޕަ މަކަރާ ހީލަތުން ގެއެއް ވިއްކާނަމޭ ކިޔާފައި އަޅުގަނޑު އަތުން ހޯދާފައިވާ ފައިސާތަކުގެ މައްސަލަ ވަރަށް އަވަހަށް ކޯޯޓަށް އެބަ ހުށަހަޅަން.
ޝަރީފް މިހެން ވިދާޅުވީ ''ހަސަން ކުރުސީ'' ގެ ނަމުގައި ހަދާފައިވާ ޓުވިޓާ އެކައުންޓުން ކުރި ޓުވީޓަކަށް ރައްދު ދެއްވަމުންނެވެ. އެ އެކައުންޓަކީ ނަޝީދު ބޭނުންކުރައްވާ އެކައުންޓެއްކަމަށް ގިނަ ބަޔަކު ތުހުމަތު ކުރެއެވެ. ނަމަވެސް ނަޝީދު އެކަން ދޮގު ކުރައްވައެވެ.
ނަޝީދުގެ ބައްޕައާ ދެކޮޅަށް ކޯޓަށް މައްސަލަ ހުށަހަޅުއްވާނެ ކަމަށް ޝަރީފް ވިދާޅުވެފައި މިވަނީ ޝަރީފާ ދެކޮޅަށް ނަޝީދު ޢަބުރުގެ ދަޢުވާ ކުރައްވާފައިވަނިކޮށެވެ.
ނަޝީދު ގަތުލުޢާންމެއް ހިންގަން އުޅުނުކަމަށް ޝަރީފް ތުހުމަތު ކުރެއްވުމުން, އަބުރު ގެއްލިފައިވާ ކަމަށް ވިދާޅުވެ ބަދަލެއްގެ ގޮތުގައި 10 މިލިއަން ރުފިޔާ ނަގައިދިނުމަށް އެދި ރައީސް ނަޝީދު ސިވިލް ކޯޓަށް މައްސަލައެއް ހުށަހެޅުއްވީ އިއްޔެގައެވެ.
