މަސްކަނޑުތައް ވިއްކައި ފައިސާކޮޅު ކާލައިގެން ތިބެ ކޮން މަސްވެރިންގެ ދުވަހެއް: ޝުޖާއު
މި ސަރުކާރުން މަސްކަނޑުތައް ވިއްކާލައިފައިވާ ކަމަށާއި އެހެންކަމުން މަސްވެރިންގެ ދުވަހުގެ ނަމުގައި ދުވަހެއް ފާހަގަކުރަން ޖެހޭތޯ ޕީއެންސީގެ ނައިބު ރައީސް އިބްރާހިމް ޝުޖާއު ސުވާލު ކުރައްވައިިފިއެވެ.
މަސްވެރިންގެ ދުވަހާ ގުޅިގެން ކުރެއްވި ޓުވީޓެއްގައި ޝުޖާއު ވިދާޅުވީ މަސްވެރިންގެ މަސްކަނޑު މި ސަރުކާރުން ވިއްކާލައިފައިވާ ކަމަށެވެ. އަދި މަސްކަނޑުތައް ވިއްކާލައި ފައިސާކޮޅު ބޭނުންކޮށްގެން ތިބެ ދެން ފާހަގަކުރަން އޮތީ ކޮން މަސްވެރިންގެ ދުވަހެއްތޯ ވެސް އޭނާ ސުވާލު ކުރެއްވިއެވެ.
މަސްވެރިންގެ މަސްކަނޑު މި ސަރުކާރުން ވަނީ ވިއްކާލާފަ. ވަގުންތައް މަސްކަނޑުތައް ވިއްކާފަ ލިބުނު ފައިސާކޮޅު ކާލައިގެން ތިބެ، ކޮން މަސްވެރިންގެ ދުވަހެއް؟
މިއަދު ވެސް މަސްވެރިން ތިބީ މަސް ކިރުވުމަށްޓަކައި ކިޔުގައި ޖެހިގެން މަސް ނުކިރިފައިކަމަށް ވެސް ޝުޖާއު ވިދާޅުވިއެވެ. އަދި ސަރުކާރުން މަސްވެރިން ބިކަކޮށްލައިފިކަމަށް ވެސް ޝުޖާއު ވިދާޅުވިއެވެ.
މަސްކަނޑުތައް ވިއްކާލި ކަމަށް ޝުޖާއު ތުހުމަތު ކުރައްވަނީ އިންޑިއާގެ މަސްވެރިން ހުއްދަ ނެތި ރާއްޖޭގެ މަސްކަނޑުތަކުގައި ހަރަކާތްތެރިވާތީއެވެ. އިދިކޮޅުން ތުހުމަތު ކުރާ ގޮތުގައި، ކޮންމެ ދުވަހަކު އެތައް މަސް ދޯންޏެއް މިގޮތަށް ހަރަކާތްތެރިވެއެވެ. އަދި މޮރިޝަސްއާއެކު އެރި ބޯޑަރުގެ މައްސަލައިގައި ސަރުކާރުން ކަންތައް ކޮށްފައިވާގޮތުން ރާއްޖޭގެ މަސްކަނޑުތައް ވިއްކާލި ކަމަށް އިދިކޮޅުން ތުހުމަތު ކުރެއެވެ.
Ads by STO
