ރިޔާސީ އިންތިޚާބަށް މުވައްޒަފުން ހޯދަނީ
އަންނަ އަހަރު ބާއްވާ ރިޔާސީ އިންތިޚާބަށް މުވައްޒަފުން ހޯދަން އިލެކްޝަން ކޮމިޝަނުން އިޢުލާނު ކުރައްވައިފިއެވެ.
އެ ކޮމިޝަނުން އިއްޔެ ކުރެއްވި އިޢުލާނުގައި ވަނީ ރިޔާސީ އިންތިޚާބު 2023 އާ ގުޅިގެން އީސީގެ އެކިއެކި މަސައްކަތްތަކަށް ބޭނުންވާ މުވައްޒަފުން ހޯދަން ބޭނުންވާ ކަމަށެވެ.
ކޮންޓްރެކްޓް އުސޫލުން 11 މުވައްޒަފުން ހޯދަނީ ރިޔާސީ އިންތިޚާބުގެ މަސައްކަތްތައް ނިމެންދެނެވެ.
މުސާރައާއި އެލަވަންސްތަކާއެކީ މަހަކު ގާތްގަނޑަކަށް 9،300 ރުފިޔާ ލިބޭނެއެވެ.
އެ މަޤާމުތަކަށް މުވައްޒަފުން ނެގުމުގައި މީގެކުރިން އިންތިޚާބުތަކުގައި މަސައްކަތް ކޮށްފައިވާ މީހުންނަށް އިސްކަންދޭނެކަމަށް އީސީން ވިދާޅުވިއެވެ.
އީސީގެ އިޢުލާނުގައިވާ ގޮތުން އެ މަޤާމުތަކަށް ކުރިމަތިލުމުގެ ސުންގަޑިއަކީ މި މަހުގެ 25 ވާ އާދީއްތަ ދުވަހުގެ 15:00އެވެ.
ރިޔާސީ އިންތިޚާބު ބާއްވަވާނެ ތާރީޚެއް އަދި އިޢުލާނެއް ނުކުރައްވައެވެ. އީސީން ކުރިން ވިދާޅުވެފައިވަނީ ރިޔާސީ އިންތިޚާބުގެ ތާރީޚު މި މަސް ނިމުމުގެ ކުރިން އިޢުލާނު ކުރައްވާނެ ކަމުގައެވެ. އެންމެ ފަހުން، 2018 ވަނަ އަހަރުގައި ރިޔާސީ އިންތިޚާބު ބާއްވައިފައިވަނީ އެ އަހަރުގެ ސެޕްޓެމްބަރުމަހުގެ 24 ވަނަ ދުވަހުއެވެ.
