ޖެންޑާ މިނިސްޓްރީގެ ކުރީގެ އިސް ތިން ވެރިއެއްގެ މައްޗަށް ދަޢުވާކުރަން ފޮނުއްވައިފި
ޖެންޑާ މިނިސްޓްރީގެ ކުރީގެ އިސް ތިން ވެރިއެއްގެ މައްޗަށް ދަޢުވާކޮށްދިނުމަށް އެދި އެންޓި ކޮރަޕްޝަން ކޮމިޝަނުން ޕްރޮސިކިއުޓާ ޖެނެރަލްގެ އޮފީހަށް ފޮނުއްވައިފިއެވެ.
ދަޢުވާކުރުމަށް އެދި ފޮނުއްވެވީ ޖެންޑާ މިނިސްޓްރީގެ ބިޑު ކޮމިޓީގެ މެމްބަރުންގެ ގޮތުގައި ކުރިން ތިއްބެވި އެ މިނިސްޓްރީގެ ސްޓޭޓް މިނިސްޓަރު ސ.ހިތަދޫ ހަނދުވަރީގޭ ޢާއިޝަތު ރަޝީދު (މިހާރު ހެލްތު މިނިސްޓްރީގެ ސްޓޭޓް މިނިސްޓަރު) އާއި, އެ މިނިސްޓްރީގެ އޭރުގެ ޑިރެކްޓަރ ގދ.ތިނަދޫ ނޫވިލު, ޙުދޫދާ ވަޙީދާއި, އެ މިނިސްޓްރީގެ ޑިރެކްޓަރު ގދ.ގައްދޫ ވިލިގަލާ, އާމިނަތު ޝިހާމާގެ މައްޗަށެވެ.
އެ ބޭފުޅުންގެ މައްޗަށް ދަޢުވާކުރަން ފޮނުއްވީ އުސޫލުތަކާއި ޚިލާފަށް ގދ.ތިނަދޫ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރު މަރާމާތުކުރަން އަމިއްލަ ކުންފުންޏަކާ ހަވާލުކުރި މައްސަލައިގައެވެ.
ތަޙްޤީޤަށް ފާހަގަކުރެވުނު ކަންކަން:
ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރުގައި ކުރަންހުރި މަރާމާތުގެ މަސައްކަތްކޮށްދޭނެ ފަރާތެއް ހޯދުމަށް ނޭޝަނަލް ޑްރަގް އެޖެންސީން ކުރި ނަންބަރު އިޢުލާނާ ގުޅިގެން ހުށަހެޅި ބިޑުތައް އެ އެޖެންސީން އިވެލުއޭޓުކޮށް އިޢުލާނާގުޅޭ މަޢުލޫމާތު ކަރުދާހުގައި ބަޔާންކޮށްފައިވާ ކްރައިޓީރިއާއާ އެއްގޮތަށް ޕޮއިންޓް ދިނުމުން އިވެލުއޭޝަނުން އެންމެ މަތިން ޕޮއިންޓް ލިބުނު ފަރާތަށް އެ މަސައްކަތް ހަވާލުކުރުމުގެ ބަދަލުގައި އިވެލުއޭޝަނުން ދެވަނައަށް ދިޔަ ކުންފުންޏަށް މަސައްކަތް ހަވާލުކުރުން.
އެ ނިންމުން ނިންމެވީ އެ ނިންމެވުމުގެ ސަބަބުން އިވެލުއޭޝަނުން ދެވަނައަށް ދިޔަ ފަރާތަށް ލިބެން ނުޖެހޭ ނާޖާއިޒު މަންފާއެއް އެ ފަރާތަށް ލިބޭނެކަން އެނގިތިބެ މަސައްކަތް ހަވާލުކުރި ފަރާތަށް ނާޖާއިޒު މަންފާއެއް ހޯދައިދިނުމުގެ މަގުސަދުގައި
އިވެލުއޭޝަނުން ދެވަނައަށްދިޔަ ކުންފުންޏާ އެ މަސައްކަތް ހަވާލުކުރުމަށް ނިންމަވާފައިވަނީ އިވެލުއޭޝަނުން އެއްވަނައަށް ދިޔަ ފަރާތަށްވުރެ 657,846.60 ބޮޑު އަގުގައި.
އެހެންކަމުން އެ ތިން ބޭފުޅުންގެ މައްޗަށް ކުރަނީ ޤާނޫނު ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާއާއި ދައުލަތަށް ފައިދާއެއް ލިބެން އޮތްކަމެއްގައި އެ ނޫންގޮތަކަށް ޢަމަލުކުރުމުގެ ކުށުގެ ދަޢުވާއެވެ.
