އެމްޑީޕީގެ ރިޔާސީ ޕްރައިމަރީ، އަންނަ މަހު

ސަރުކާރު ހިންގާ މައި ޕާޓީ، މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ރިޔާސީ ޕްރައިމަރީ އަންނަ މަހުގެ 28 ވަނަ ދުވަހު ބާއްވަން ނިންމައިފިއެވެ.

Ads by STELCO

އެ ޕާޓީން މިއަދު ކުރި އިޢުލާނެއްގައި ވަނީ ރިޔާސީ ޕްރައިމަރީގައި ވާދަ ކުރުމުގެ ފުރުޞަތު ހުޅުވައިލައިފައެވެ. އެމްޑީޕީން ބުނެފައިވަނީ 2023 ވަނަ އަހަރުގެ ރިޔާސީ އިންތިހާބުގައި އެމްޑީޕީގެ ޓިކެޓްގައި ވާދަކުރާނެ ކެންޑިޑޭޓެއް ހޮވުމަށް ބާއްވާ ޕްރައިމަރީ 28 ޖެނުއަރީ 2023 ވާ ހޮނިހިރު ދުވަހު އޮންނާނެ ކަމަށާއި، މި އިންތިޚާބުގައި ވާދަކުރެވެނީ އެ ކެންޑިޑޭޓަކު ޕްރައިމަރީގައި ވާދަކުރުމަށް ތާއީދުކުރާ އެމްޑީޕީގެ 500 މެންބަރުންގެ ތާއީދު ލިބިގެން ކަމަށެެވެ.

ޕްރައިމަރީގައި ވާދަކުރުމުގެ ފުރުޞަތު ލިބޭނެ ފަހު ދުވަހަކީ 24 ޑިސެމްބަރ 2022 ވާ ހޮނިހިރު ދުވަހުގެ ހަވީރު 4:00އެވެ.

އެމްޑީޕީގެ ރިޔާސީ ޓިކެޓަށް ޝައުގުވެރިކަން ފާޅުކުރެއްވީ، އެ ޕާޓީގެ އިސް ލީޑަރު، ރައީސް އިބްރާހީމް މުޙައްމަދު ޞާލިޙާއި، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އެކަންޏެވެ. މި ދެ ބޭފުޅުންގެ ދެ ފެކްޝަނުގެ މެދުގައި ބޮޑު ކޯޅުމެއް އުފެދިފައިވާއިރު، ރައީސް ޞާލިޙުގެ ފެކްޝަނުގެ ބޭފުޅުން ގެންދަވަނީ ރިޔާސީ ޕްރައިމަރީގައި އެމަނިކުފާނަށް ތާއީދު ކުރައްވާނެ ކަމަށް ވިދާޅުވަމުންނެވެ.