ޓާމިނަލްގެ މަސައްކަތް ދިގު ލައިގެންދާތީ، ޝުޖާއުގެ ފާޑު ކިޔުން
ވެލާނާ އިންޓަރނޭޝަނަލް އެއާޕޯޓުގެ އަައު ޓާމިނަލްގެ މަސައްކަތް ނުނިމި، ދިގުލައިގެންދާތީ، ޕީއެންސީގެ ނައިބު ރައީސް، އަދި ހުޅުމާލޭގެ ކައުންސިލަރު އިބްރާހީމް ޝުޖާާޢު އެކަމަށް ފާޑުވިދާޅުވެއްޖެއެވެ.
ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް މި އަހަރު ޖެއްސި ޕްރައިވެޓް ޖެޓްތަކުގެ އަދަދު 2،610 އަށް އަރާފައިވާ ކަމަށް އެމްއޭސީއެލުން ހާމަކުރެއްވުމާ ގުޅިގެން، ޝުޖާޢު ވިދާޅުވީ އެ ކުރިއެރުން ދިވެހި ޤައުމަށް ހޯއްދަވައިދެއްވީ ކުރީގެ ރައީސް ޔާމީން އަބްދުލްޤައްޔޫމް ކަމަށެވެ.
އަދި އެ މަނިކުފާނުގެ ވެރިކަމުގައި މަސައްކަތް ފެއްޓެވި އައު ޓާމިނަލް މަޝްރޫޢު، އަދިވެސް ނިންމިފައިނުވާތީ، އެކަމަށްވެސް އޭނާ ފާޑުވިދާޅުވިއެވެ.
އައު ޓާމިނަލްގެ ބޭރު ޑިޒައިން ކޮށްފައި ވަނީ ރާޅުތަކެއްގެ ސިފަވާ ގޮތަށެވެ. ބޭރުން ފެންނަ ފާރުތައް ޑިޒައިންކޮށްފައި ވަނީ އިހުގެ މިސްކިތްތަކުގެ ފާރުގައި ހުންނަ ކަހަލަ ހިރިގަލުގެ ކުރެހުންތައް އަސްލަކަށް ބަލައިގެންނެވެ.
ގާތްގަނޑަކަށް 78،000 އަކަމީޓަރުގެ ޖާގަ ހިމެނޭ މި ޓާމިނަލް ހަދަނީ އެންމެ ޒަމާނީ ޚިދުމަތްތައް ލިބޭ ގޮތަށެވެ. މި ޓާމިނަލްގެ މަސައްކަތް މުޅިން ނިންމައިލެވޭނީ އަންނަ އަހަރުގެ ފަހުކޮޅުގައި ކަމަށް އެމްއޭސީއެލުން ވަނީ ވިދާޅުވެފައެވެ.
