އިދިކޮޅު މުޒާހަރާ: ދެ މީހުން ފިޔަވައި އެންމެން ދޫކޮށްލައިިފި
އިދިކޮޅު ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް މިނިވަން ކުރަން ގޮވާލައި އިދިކޮޅު ކޯލިޝަނުން ރޭ ކުރި މުޒާހަރާގައި ހައްޔަރުކުރި މީހުންގެ ތެރެއިން ދެ މީހަކު ފިޔަވައި އެންމެން ދޫކޮށްލައިފިއެވެ.
އިދިކޮޅު ފަރާތްތަކުން މިހާރު ކުރަމުންދާ ސިލްސިލާ މުޒާހަރާތަކުގެ ތެރެއިން ރޭ ކުރި މުޒާހަރާގައި ޖުމްލަ 21 މީހަކު ހައްޔަރުކުރިއެވެ.
އޭގެތެރޭގައި ރައްޔިތުން މަޖިލީހުގެ މާވަށު ދާއިރާގެ މެންބަރު އަދި ޕީއެންސީގެ ނައިބު ރައީސް މުޙައްމަދު ސަޢީދު ވެސް ހިމެނިވަޑައިގަންނަވައެވެ.
ފުލުހުންގެ އޮފިޝަލަކު ވިދާޅުވީ ދެ މީހަކު ފިޔަވައި އެންމެން މިހާރު ދޫކޮށްލާފައިވާ ކަމުގައެވެ. އެ އެންމެން ވެސް ދޫކޮށްލީ ރޭގެ ވަގުތެއްގައެވެ.
ވ.އާރަށް ކުއްޔަށް ދޫކުރުމުގެ މުޢާމަލާތުގައި ރިޝްވަތު ނެންގެވުމާއި މަނީ ލޯންޑްރިންގެ ކުށް ސާބިތުވުމުން ކްރިމިނަލް ކޯޓުން ރައީސް ޔާމީނަށް 11 އަހަރުގެ ޖަލު ޙުކުމެއް އިއްވެވީ މި މަހުގެ 25 ވަނަ ދުވަހުގައެވެ.
ރައީސް ޔާމީން މިނިވަން ކުރަން ގޮވާލައި އަންނަ ހުކުރު ދުވަހު މުޅި ރާއްޖޭގައި މުޒާހަރާ ކުރަން އިދިކޮޅު ކޯލިޝަނުން ވަނީ ނިންމައިފައެވެ.
Ads by STO
