ލިސްޓުގައި ނަން ނެތިގެން 900 އެއްހާ މީހުން ޝަކުވާ ހުށަހަޅައިފައިވޭ: އެމްޑީޕީ
މި މަހު ބާއްވާ އެމްޑީޕީގެ ރިޔާސީ އިންތިހާބުގެ ވޯޓާސް ލިސްޓުގައި 900 އެއްހާ މީހުންގެ ނަން ނެތިގެން ޝަކުވާ ހުށަހަޅާފައިވާ ކަމަށް، އިންތިހާބު އިންތިޒާމު ކުރަން ނަގާފައިވާ ކޮމިޓީއިން މިއަދު ބުނެފިއެވެ.
އެމްޑީޕީ ޕްރައިމަރީއަށް ހޮވި ފަސް މެންބަރުންގެ ކޮމިޓީން މިއަދު އެމްޑީޕީގެ އޮފީހުގައި ބޭއްވު ނޫސްވެރިންގެ ބައްދަލުވުމުގައި ކޮމިޓީގެ މުގައްރިރު އިބްރާހިމް ވަހީދު (އިބުރޭ) ވިދާޅުވީ އިލެކްޝަންސް ކޮމިޝަންގެ ދަފްތަރުގައި އެއްވެސް ޕާޓީއެއްގައި ނަން ނެތް 683 މީހުންނާއި އިލެކްޝަންސް ކޮމިޝަންގެ ދަފްތަރުގައި އެހެން ޕާޓީތަކުގައި ނަން އޮތް 212 މީހުން ޝަކުވާ ހުށަހަޅާފައިވާ ކަމަށެވެ.
އިބުރޭ ވިދާޅުވީ ޝަކުވާ ކޮމިޓީން މައްސަލަތައް ބަލާފައިވާ ކަމަށާއި ހުރިހާ ޝަކުވާތަކަށް ޖަވާބު ދިނުމުގެ މަސައްކަތް މިއަދު ފަށާނެ ކަމަށެވެ.
މީގެ އިތުރުން ކޮމިޓީގައި އެއްވެސް ގަވައިދާއި ހިލާފުކަމެއް ހިނގާފައި ނުވާކަމަށާއި މެމްބަރުން ހަމަޖެއްސުމާއި އަދި އެ ނޫން ވެސް މަސައްކަތްތައް ކުރިޔަށް ގޮސްފައި ވަނީ އާއްމުކޮށް ވެސް އަމަލު ކުރަމުން އައި އުސޫލުގެ ތެރެއިން ކަމަށް އިބުރޭ ވިދާޅުވިއެވެ.
އަދި ޝަކުވާ ހުށަހަޅާފައިވީ ނަމަވެސް އިންތިހާބު ފަސް ކުރަން ޖެހޭ ހާލަތެއް ނެތް ކަމަށް އިބުރޭ ވިދާޅުވިއެވެ.
“މީގެ ކުރިން އިންތިހާބުތައް ބާއްވައި، އެކަންކަން ކޮށްފައި އޮތުމާއި މިކަންކަމަށް ބަލާއިރު، މި ކޮމިޓީއަކަށް ފާހަގައެއް ނުވޭ އިންތިހާބު ލަސް ކުރަން ޖެހޭ ހާލަތެއް އޮތް ކަމަކަށް" އިބުރޭ ވިދާޅުވިއެވެ.
