ނަޝީދު، ޝަރީފަށް: ހަޑިކޮށް ނޫޅުއްވާނެ ކަމަށް 100 ފަހަރު ލިޔޭ
މިއަދުގެ ރައްޔިތުންގެ މަޖިލީހުގެ ޖަލްސާގައި މަރަދޫ ދާއިރާގެ މެމްބަރު އިބްރާހިމް ޝަރީފް އަޑުގަދަ ކުރައްވަން ފެއްޓެވުމުން، ހަޑިކޮށް ނޫޅުއްވާނެ ކަމަށް 100 ފަހަރު ލިޔުއްވުމަށް މަޖިލިހުގެ ރައީސް މުހައްމަދު ނަޝީދު، އޭނާ އަށް އަންގަވައިފިއެވެ.
މިއަދުގެ ޖަލްސާގައި ހައުސިން މިނިސްޓަރު މުހައްމަދު އަސްލަމް މެމްބަރަކު ކުރެއްވި ސުވާލަކަށް ދެއްވި ޖަވާބަކާއި ގުޅިގެން ހިތްހަމަނުޖެހުން ފާޅުކުރައްވައި މަޖިލީހުގެ ރައީސް ދެއްކެވި ވާހަކަފުޅަކާ ގުޅިގެން ޝަރީފް ވަނީ ވަރަށް ބޮޑަށް ކޯފާ އިސްކުރައްވައި މަޖިލީހުގައި އަޑުގަދަ ކުރައްވަން ފައްޓަވާފައެވެ.
ޝަރީފް ވިދާޅުވީ ވަޒީރުން މަޖިލިހަށް ވަޑައިގެން ސުވާލުތަކަށް ޖަވާބު ދެއްވީމަ، ނަޝީދު ވިދާޅުވާ ގޮތް ގޮތުން "ވާންވީ ގޮތާއި" "ވާންވި ގޮތެއް" އަދި "ޕޮލިސީ" އަކީ ކޮބައިކަން ސާފެއް ނުވާ ކަމަށެވެ.
ޝަރީފްގެ ވާހަކަ ނުނިމެނީސް މައިކް ކަނޑާލެއްވުމުން ޝަރީފް އަޑުގަދަ ކުރައްވަން ފެއްޓެވިއިރު ނަޝީދު ވަނީ މަޖިލީހުގެ ނިޒާމު ގެއްލޭފަދަ ކަމެއް ނުކުރަން ޝަރީފަށް ނަސޭހަތްތެރިވެފައެވެ. އަދި ފަހުން ނަޝީދު ވަނީ މަޖިލީހުގައި އެގޮތަށް ހަޑިކޮށް ނޫޅުއްވާނެ ކަމަށް 100 ފަހަރު ލިޔުއްވަން ޝަރީފަށް ދަންނަވާފައެވެ.
"މަރަދޫ ދާއިރާގެ މެމްބަރަށް ދަންނަވަން، 100 ފަހަރު ލިޔުއްވަން އެގޮތަށް ހުތުރުކޮށް، ހަޑިކޮށް ނޫޅުއްވުމަށް،" ނަޝީދު ވިދާޅުވިއެވެ.
Ads by STO
