ސަރުކާރުގެ ތަރައްޤީގެ ސްޕީޑް ސްލޯ ކަމަށްބުނެ، ޔާސިރުގެ ތާއީދު ރައީސް ނަޝީދަށް
މިމަހު ފަހުކޮޅު އޮންނަ އެމްޑީޕީގެ ރިޔާސީ ޕްރައިމަރީގައި ކުޅުދުއްފުށީ އުތުރު ދާއިރާގެ މެންބަރު ޔާސިރު އަރަފާތުގެ ތާއީދު ރައީސް ނަޝީދަށް ކުރުމަށް ނިންމައިފިއެވެ.
މި އިންތިޚާބުގައި ރައީސް ނަޝީދާ ވާދަ ކުރައްވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.
މިއަދު ޔާސިރު ކުރެއްވި ޓްވީޓެއްގައި ވިދާޅުވީ، ފާއިތުވެދިޔަ 4 އަހަރު ރައްޔިތުންގެ މަޖިލީހުގެ މެންބަރެއްގެ ހައިސިއްޔަތުން ރައްޔިތުންގެ ކުރިއެރުމަށް އަދި ޚާއްސަކޮށް ކުޅުދުއްފުށީގެ ތަރައްޤީއަށް އަދުގެ ސަރުކާރަށް ދޭން ޖެހުނު ހުރިހާ އެއްބާރުލުމެއް ދީފައިވާނެ ކަމަށެވެ.
އެހެންނަމަވެސް ރައީސް ސޯލިހުގެ ފަރާތްޕުޅުން ކުޅުދުއްފުއްޓާއި މެދު ފެނިފައި ވަނީ ވަރަށް "ގަޔަށް ދޫ" ސިޔާސަތެއް ކަމަށާއި ތަރައްޤީގެ މަޝްރޫއުތައް އިންތިހާއަށް ލަސްކަމަށް ވިދާޅުވިއެވެ. އަދި ރައީސް ޞާލިޙަށް ކުރަމުން އައި ތާއީދު އަނބުރާ ގެންދަވާ، މި އިންތިޚާބުގައި ރައީސް ނަޝީދަށް ތާއީދު ކުރުމަށް ނިންމާފައިވާ ކަމަށް ވެސް ވިދާޅުވިއެވެ.
ޔާސިރު އިތުރަށް ވިދާޅުވީ، ރައީސް މުހައްމަދު ނަޝީދަކީ ވިސްނުމާއި، އިލްމާއި ހިލްމު އަދި ބުންވަރާއި، ހިތްވަރި ހުރި ހަމައެކަނި ސިޔާސީ ލީޑަރު ކަމަށެވެ. އަދި އެއީ ދިވެހިރާއްޖޭގައި މިވަގުތު ހުރި އެންމެ ވަރުގަދަ ސިޔާސީ ލީޑަރު ކަމަށް ވިދާޅުވިއެވެ.
ރައީސް ނަޝީދުގެ ކެންޕެއިންގައި މަޖިލިސް މެންބަރުންގެ ތެރެއިން އީވާ، އިންތި، ވައްޑެ، އިލްޔާސް، ފިރްޝާން، ބޮންޑެ އަދި އަލީ އާޒިމް ދަނީ ސީދާ ހަރަކާތުގައި ހަރަކާތްތެރިވަމުންނެވެ.
ޔާސިރުގެ އިތުރުން ކުޅުދުއްފުށީ ސިޓީ މޭޔަރު އާތިފް ވެސް ވަނީ ރައީސް ނަޝީދަށް ތާއީދު ކުރައްވާފައިވާކަން ހާމަކުރައްވާފައެވެ.
އާތިފް މިއަދު ވިދާޅުވީ، އެމްޑީޕީގެ ދެ ސަރުކާރެއް ތަޖުރިބާކޮށްފައިވާ ކަމަށާއި ކުޅުދުއްފުއްޓަށް ތަރައްޤީ ގެނެސްދީފައިވަނީ ރައީސް ނަޝީދުގެ ސަރުކާރުން ކަމަށެވެ. އަދި މިއީ ރައްޔިތުންގެ މަސްލަޙަތު އޮތް ގޮތް ކަމަށް ވެސް ވިދާޅުވިއެވެ.
އެމް ޑީ ޕީގެ ދެރައީސުން ދެބޯ ގެރި ދުއްވުމުގައި ބައިވެރި ވަނީ ރާށުގެ ދަރިން ގެނައުމުންވެސް ރަށަށް ތަރައްގީ ނުގެނެވުނީތީ ދެވަނަ ދައުރު ބޭނުންވާ ދެ މީހުން އަދި ކިޔެއް އެމްޑީޕީގެ ރަށްވެހި ފަތިސް އެޖެންޑާ ނަވާރަ އަދި ލާމަރުކަޒު ނިޒާމު ޖަޒީރާ ރާއްޖެ އޮންނާނީ ރަނޅަށް ފެނިފަ ކެކެކެ