ޕްރައިމަރީގެ ކެމްޕޭނަށް ރައީސް މިއަދު ނ. އަތޮޅަށް ވަޑައިގަންނަވަނީ
މި މަހުގެ މަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް މިއަދު ނ. އަތޮޅަށް ވަޑައިގަންނަވާގޮތަށް ހަމަޖެހިއްޖެއެވެ.
"އެމްޑީޕީ ކުރިއަށް" ނަމުގައި ރައީސް ޞާލިހް ކުރައްވަމުން ގެންދަވާ ކެމްޕޭން ރ. އަތޮޅުގެ ބައެއް ރަށްރަށުގައި ކުރެއްވުމަށްފަހު އެމަނިކުފާނު މިއަދު ނ. އަތޮޅުގެ ބައެއް ރަށްރަށަށް ޒިޔާރަތް ކުރައްވާ އެރަށްރަށުގެ ރައްޔިތުންނާއި ބައްދަލުކުރައްވާނެއެވެ. އެގޮތުން އެ މަނިކުފާނާއި ކެމްޕޭން ޓީމް އެ އަތޮޅުން އެންމެ ފުރަތަމަ ވަޑައިގަންނަވަން ހަމަޖެހިފައި ވަނީ ކެނދިކުޅުދުއަށެވެ.
ރިޔާސީ ޕްރައިމަރީގެ ކެމްޕޭނަށް ރައީސް މިއަދު ނ. އަތޮޅަށް ވަޑައިގަންނަވާއިރު،ރޭ ރ. މީދޫގައި ވަނީ އެމަނިކުފާނުގެ ކެމްޕޭނުގެ ފޯރިގަދަ ޖަލްސާއެއް ބާއްވަވައިފައެވެ. އަދި މި ކެމްޕޭނުގައި އެމަނިކުފާނުވަނީ ރ. އަތޮޅުގެ ބައެއް ރަށްރަށްވެސް ޒިޔާރަށް ކުރައްވައިފައެވެ.
މިމަހުގެ 28 ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމަރީ އިންތިޚާބަށް އެޕާޓީން ފޯރިއާއެކު ތައްޔާރުވަމުން އަންނައިރު، މި އިންތިޚާބުގައި ވާދަކުރައްވާނީ ރައީސް ޞާލިހާއި ރައީސް ނަޝީދެވެ.
ދެބޭފުޅުންވެސް މިހާރު ގެންދަވަނީ ވަރަށް ފޯރިއާއެކު ކެމްޕޭން ކުރައްވަމުންނެވެ.
