އިމްރާން، އެމްޑީޕީ ޕްރައިމަރީގައި ރައީސް ޞާލިހަށް ކެމްޕެއިން ކޮށްދެއްވަނީ
މިމަހު 28 ވަނަ ދުވަހު ބޭއްވުމަށް ތައްޔާރުވަމުންދާ އެމްޑީޕީގެ ރިޔާސީ ޕްރައިމަރީއަށް ކެމްޕެއިން ކޮށްދެއްވަން އަދާލަތު ޕާޓީގެ ރައީސް ޝެއިހް އިމްރާން އަބްދުﷲ، ފައްޓަވައިފި އެވެ.
އެމްޑީޕީ ޕްރައިމަރީގައި ދެ ކެނޑިޑޭޓުން ވާދަ ކުރައްވާއިރު ހޯމް މިނިސްޓަރުކަންވެސް ކުރައްވާ އިމްރާން ކެމްޕެއިން ކޮށްދެއްވަނީ ރައީސް އިބްރާހިމް މުހައްމަދު ޞާލިހަށެވެ. އެގޮތުން ވޭތުވެ ދިޔަ ހަފްތާގެ ކޮންމެ ދުވަހެއްގައި އިމްރާން ވަނީ ސޯޝަލް މީޑިއާގައި ރައީސް ޞާލިހަށް ވޯޓު ދޭންޖެހޭ ސަބަބުތައް ލިޔުއްވައިފަ އެވެ.
އިމްރާން ވިދާޅުވާ ގޮތުގައި އެންމެ ރަނގަޅު ވެރިކަމެއް ކުރެވޭނީ އެންމެ މޮޅަށް މީހުން މެނޭޖު ކުރެވޭ މީހަކަށް ކަމީ ޒަމާނުއްސުރެއް އިންސާނުން ގަބޫލުކުރަމުން އަންނަ ހަގީގަތެއް ކަމަށެވެ. އަދި ހުރިހާ ދިވެހިންނަށް އެންމެ ފައިދާ ހުރި ގޮތަށް ދިވެހިންގެ ވިސްނުމާއި އެއްގޮަތށް ރާއްޖޭގެ ވެރިކަން ކުރާނެ ގޮތެއް ހޯދައިދިނުމީ ސިޔާސީ ލީޑަރުން ހޯދަން ޖެހޭ އަގެއް ކަމަށްވެސް އޭނާ ވިދާޅުވި އެވެ.
އިމްރާން މިފަދަ މޭރުމަކުން ލިޔުއްވާފައި މިވަނީ ކޯލިޝަނަކާއިއެކު ނޫނީ ވެރިކަން ނުހޯދޭނެކަމަށް ރައީސް ޞާލިހު ވިދާޅުވަމުން ގެންދަވާ ދަނޑިވަޅެއްގަ އެވެ. އެމްޑީޕީ އަކީ ރާއްޖޭގެ އެންމެ ބޮޑު ސިޔާސީ ޕާޓީ ނަމަވެސް މައިނޯރިޓީ ޕާޓީތަކުގެ އެހީތެރިކަމާއި ނުލައި ވެރިކަމަށް ނާދެވޭނެކަމަށް ރައީސް ޞާލިހު ވިދާޅުވެ އެވެ.
"ގިނަ ސިޔާސީ ޕާޓީތައް ގޮވައިގެން މަސައްކަތް ނުކުރެވޭ ބޭފުޅަކަށް ދެން ރާއްޖޭގެ ވެރިކަން ކުރަން ފަސޭހައެއް ނުވާނެ" އިމްރާން ވިދާޅުވި އެވެ.
އިމްރާން މިފަދައިން ވިދާޅުވި ނަމަވެސް އެމްޑީޕީ ޕްރައިމަރީއަށް ކުރިމަތިލައްވައިގެން އުޅުއްވާ އަނެއް ކެނޑިޑޭޓު ރައީސް މުހައްމަދު ނަޝީދު ބޭނުންފުޅުވަނީ އެމްޑީޕީގެ އަސްލު ސިޔާސަތުތައް ތަންފީޒު ކުރުމަށް އެމްޑީޕީ އެކަނި ވެރިކަމަށް އައުމަށެވެ. ކޯލިޝަން ހަދައިގެން އެހެން ސިޔާސީ ޕާޓީތައް ސަރުކާރު ތެރެއަށް ވަނުމުން އެމްޑީޕީން ރައްޔިތުންނަށް ވީ ވައުދުތައް ފުއްދަން ދަތިވާކަމަށް ރައީސް ނަޝީދު ގެންދަވަނީ ވިދާޅުވަމުންނެވެ.
އެމްޑީޕީގެ ޕްރައިމަރީއާއި ދިމާކޮށް އެހެން ޕާޓީއެއްގެ ރައީސަކު ފާޅުގައި ވަކި ކެނޑިޑޭޓަކަށް ކެމްޕެއިން ކުރާތީ އެމްޑީޕީ މެމްބަރުންގެ ފާޑުކިޔުން ވަނީ އަމާޒުވެފަ އެވެ. ޕާޓީގެ އެތެރޭގެ އިންތިހާބެއްގައި އެހެން ޕާޓީއަކުން ނުފޫޒު ފޯރުވުމަކީ މީގެ ކުރިން ހިނގި ކަމެއް ނޫނެވެ.
އިމްރާން މީގެ ކުރިން ވަނީ ރިޔާސީ އިންތިހާބު ކައިރިވީމައި ލައްކަ ވާހަކަ ދައްކަން ހުންނާނެކަމަށްވެސް ވިދާޅުވެފަ އެވެ. އެހެންނަމަވެސް އެވާހަކަތަކުގެ ތަފްސީލެއް އިމްރާން ނުދެއްވަ އެވެ.
Ads by STO
