ޝުޖާޢު އެލްޖީއޭއަށް: ރައްޔިތުންގެ ދޫބުރިކުރަން ނޫޅުއްވާ
ކުރީގެ ރައީސް އަދި އިދިކޮޅު ލީޑަރު، ރައީސް އަބްދުﷲ ޔާމީން ޖަލަށް ލުމާ ދެކޮޅަށް ބައެއް ރަށްރަށުގެ ކައުންސިލުން ބަޔާން ނެރުއްވައިފައި ވަނިކޮށް އެކަން ނުކުރުމަށް ލޯކަލް ގަވަރމެންޓް އޮތޯރިޓީ (އެލްޖީއޭ) އިން ކައުންސިލްތަކަށް އެންގި އެންގުމަށް މާލޭ ސިޓީ ކައުންސިލްގެ ހުޅުމާލޭ މެމްބަރު އިބްރާހިމް ޝުޖާޢު ރައްދު ދެއްވައިފިއެވެ.
އޭނާ ވިދާޅުވީ ކައުންސިލްތަކުން އިއްވަވަނީ ރައްޔިތުންގެ ބަސްކަމަށާއި އެއީ ޑިމޮކްރަސީއާއި ޤާނޫނު އަސާސީން ރައްޔިތުންނަށް ލިބިފައިވާ މިނިވަންކަން ހަނިކުރުންކަމަށެވެ.
"ކައުންސިލް ތަކުން އިއްވަނީ ރައްޔިތުންގެ ބަސް.އެކަމެއް އެލްޖީއޭއަށް ނުހުއްޓުވޭނެ. ރައްޔިތުންގެ ދޫބުރިކުރަން ނޫޅުއްވާ. ތިއީ ހުތުރު ކަމެއް. ޑިމޮކްރަސީއާއި ޤާނޫނު އަސާސީން ރައްޔިތުންނަށް ލިބިފައިވާ މިނިވަންކަން ހަނިކުރުން. ތިކަން ހުއްޓާލާ" ޝުޖާއު ވިދާޅުވިއެވެ.
ޝުޖާޢު މިހެން ވިދާޅުވީ ކުރީގެ ރައީސް ޔާމީންގެ މައްޗަށް ދައުލަތުން އުފުލި ދެ ދައުވާއެއް ސާބިތުވާކަމަށް ކަނޑައަޅައި، މިދިޔަ މަހު ކުރިމިނަލް ކޯޓުން އިއްވި 11 އަހަރުގެ ޖަލު ހުކުމަކީ ސިޔާސީ ނުފޫޒުން އިއްވާފައިވާ ކަމަށް އިދިކޮޅު ފަރާތްތަކުންނާއި ބައެއް ކައުންސިލްތަކުން ވިދާޅުވަމުންދާ ދަނޑިވަޅެއްގައެވެ.
Ads by STO
