ކޮވިޑް-19: ޔޫތު މިނިސްޓްރީގެ މުވައްޒަފެއް ފައްސި ވެއްޖެ
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓްގެ މުވައްޒަފެއް ކޮވިޑް-19 އަށް ފައްސި ވެއްޖެއެވެ.
"ދެން" އަށް އެނގިފައިވާ ގޮތުގައި އެމިނިސްޓްރީގެ މުވައްޒަފެއް ކޮވިޑަށް ފައްސިވެގެން ވެލާނާގޭ ތިންވަނަ ފަންގިފިލާ މިއަދު ޑިސްއިންފެކްޓު ކުރުމަށް ވެސް ވަނީ ނިންމާފައެވެ. އެހެންކަމުން ވެލާނާގޭގައި މަސައްކަތް ކުރާ އެމިނިސްޓްރީގެ މުވައްޒަފުން މިއަދު އޮފީހަށް ދާންް ނުޖެހޭނެ ކަމަށް ޔޫތު މިނިސްޓްރީން ވަނީ އެމިނިސްޓްރީގެ މުވައްޒަފުންނަށް އަންގާފައެވެ. އަދި ދެން އޮފީހަށް ނިކުންނަން ޖެހޭނެ ދުވަހެއް ފަހުން އަންގާނެ ކަމަށް ވެސް ބުނެފައިވެއެވެ.
އެނގިފައިވާ ގޮތުގައި ކޮވިޑަށް އެމިނިސްޓްރީން ފައްސިވެފައިވަނީ އެތަނުގެ އަންހެން މުވައްޒަފެކެވެ.
"ދެން" އަށް މައުލޫމާތު ދެއްވަމުން ޔޫތު މިނިސްޓަރ ގެ ޕަރސަނަލް އެސިސްޓަންޓް އަޒްމޫން އަޙުމަދު ވިދާޅުވީ އެމިނިސްޓްރީގެ މުވައްޒަފެއް ކޮވިޑަށް ފައްސިވެފައިވާ ކަމަށާއި އެހެންކަމުން މިއަދު އެމިނިސްޓްރީ ޑިސްއިންފެކްޓު ކުރުމަށް ހަމަޖެހިފައިވާ ކަމަށެވެ.
"އެމުވައްޒަފުގެ ކިބައިން ކޮވިޑުގެ އަލާމާތްތައް ފެނިފައިވަނީ 10 ވަނަ ދުވަހު، އެދުވަހު ސާމްޕަލް ނަގާފައި ކޮވިޑަށް ފައްސިކަން އެނގުނީ އިއްޔެ" އަޒްމޫން ވިދާޅުވެފައިވެއެވެ.
Ads by STO
