އެމްޑީޕީ ޕްރައިމަރީ: މާލޭގެ ވޯޓުގެ 51 އިންސައްތަ ރައީސް ޞާލިޙަށް!
އެމްޑީޕީގެ ރިޔާސީ ޕްރައިމަރީގައި ވާދަކުރެއްވި އެ ޕާޓީގެ އިސް ލީޑަރު، ރައީސް އިބްރާހީމް މުހައްމަދު ޞާލިޙް، މާލޭގެ ދާއިރާތަކުގެ ވޯޓުގެ %51 ހޯއްދަވައިފިއެވެ.
އެމްޑީޕީގެ ރިޔާސީ ޕްރައިމަރީ އިންތިޚާބުގެ ތެރެއިން މިހާތަނަށް ގުނުނު 163 ވޯޓު ފޮށިން މިހާތަނަށް ކަށަވަރު ކުރެވުނު ނަތީޖާތަކުން އިންތިހާބު ކާމިޔާބު ކުރައްވާފައިވަނީ ރައީސް ޞާލިޙެވެ.
ވާދަވެރިކަން ބޮޑު މި ޕްރައިމަރީގައި ރައީސް ޞާލިޙް ވާދަކުރެއްވީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް، މުހައްމަދު ނަޝީދާއެވެ. އެންމެ ފަހުގެ ނަތީޖާއަށް ބަލާއިރު ރައީސް ޞާލިޙަށް ލިބިފައިވަނީ 18،200 ވޯޓެވެެ. އަދި ރައީސް ނަޝީދަށް ލިބިފައި ވަނީ 10،669 ވޯޓެވެ.
މިއީ ދައުލަތުގެ ދެ ބާރެއްގެ ވެރިޔަކު ޕާޓީއެއްގެ ޕްރައިމަރީގައި ވާދަކުރެއްވި ފުރަތަމަ ފަހަރެވެ. މި އިންތިހާބަކީ އެމްޑީޕީގެ ތާރީހުގައިވެސް ބޭއްވުނު އެންމެ ވާދަވެރި އިންތިހާބެވެ. ރައީސް ޞާލިޙް އިންތިހާބު ކާމިޔާބު ކުރެއްވުމާއެކު ކުރިއަށްއޮތް ރިޔާސީ އިންތިޚާބުގެ ޓިކެޓް އެމަނިކުފާނަށް ވަނީ ކަށަވަރުކުރައްވާފައެވެ.
މި އިންތިހާބުގައި 57،257 މީހުންނަށް ވޯޓުލުމުގެ ހައްގު ލިބިފައިވާއިރު 30،000 އަށް ވުރެ ގިނަ މީހުން ވޯޓުލާފައިވެއެވެ. މި އިންތިހާބުގައި 243 ވޯޓު ފޮށި ބަހައްޓާފައިވެއެވެ.
