ފަލަސްތީނުގެ ބިންތަކުގައި ޔަހޫދީން ގިނަ ކުރާނެ ކަމުގެ އިންޒާރު ދީފި
ފަލަސްތީނުގެ ހުޅަނގުއައްސޭރީގެ ޔަހޫދީން އާބާދު ކުރުން ވަރުގަދަ ކުރަން އިޒްރޭލްގެ ބޮޑުވަޒީރު ބެންޖަމިން ނަތަންޔާހޫ ނިންމައިފިއެވެ.
ބޮޑުވަޒީރު ނަތަންޔާހޫ މިފިޔަވަޅުތައް އަޅަން ނިންމެވީ ހިފާފައިވާ ހުޅަނގުއައްސޭރީގައި ފަލަސްތީނުގެ ދެ ބމީހަކު ބަޑިޖެހުމުގެ ހާދިސާތަކެއް ހިންގައި އިޒްރޭލުގެ ހަތް މީހަކު މަރާލައި ފަސް މީހަކު ޒަހަމްކޮށްލުމާ ގުޅިގެންނެވެ.
ނަތަންޔާހޫގެ ރަސްމީ ފޭސްބުކް ޕޭޖުގައި، ފަލަސްތީނުގެ ބިންތަކުގައު ޔަހޫދީން އާބާދު ކުރުން އިތުރު ކުރާނެކަން އިއުލާނު ކުރިޔަސް، އިތުރު ތަފްސީލެއް ދީފައެއް ނުވެއެވެ.
ނަތަންޔާހޫ ވަނީ ހަމަލާދިން ފަލަސްތީނުގެ މީހުންނަކީ ޓެރަރިސްޓުން ކަމަށް ތުހުމަތު ކޮށްފައެވެ. އެ މީހުންނަށް އަދަބެއްގެ ގޮތުން، ގެތައް ހަލާކުކޮށްލުމަށާއި، އެފަދަ ފަރާތްތަކާ ގުޅުން އޮންނަ ފަރާތްތަކުގެ ސިއްހީ އިންޝޫރަންސާއި އެހެނިހެން އިޖުތިމާއީ ރައްކާތެރިކަމުގެ ޚިދުމަތްތައް ކަނޑާލުމަށްވެސް ނިންމައިފައެވެ.
އިޒްރޭލުން ހިފާފައިވާ ފަލަސްތީނުގެ ބިންތަކުގައި ޔަހޫދީން އާބާދު ކުރަން ހިންގާ ހަރަކާތްތަކާ، އެމެރިކާގެ ރައީސް ޖޯ ބައިޑަންގެ ސަރުކާރުން ދެކޮޅެވެ.
