ފައްޔާޒް ނަޝީދަށް: އަލުން ވިސްނާލައްވާ!
'ފިކުރެއްގެ ދިރުން' ނަމުގައި އެމްޑީޕީގެ ގޮފިތައް ހުރިހައި ރަށެއްގައި ވެސް އަލުން ހެދުމަށް ކުރީގެ ރައީސް މުޙައްމަދު ނަޝީދު ހުށަހެޅުއްވި ހުށަހެޅުމާ ދޭތެރޭ އަލުން ވިސްނަވައކލެއްވުމަށް އެމްޑީޕީގެ ޗެއަރޕާރސަން ފައްޔާޒް އިސްމާއީލް ރައީސް ނަޝީދު ކިބައިން އެދިވަޑައިގެންފިއެވެ.
ހޮނިހިރު ދުވަހު ބޭއްވި އެމްޑީޕީގެ ރިޔާސީ ޕްރައިމަރީއިން ބޮޑު ތަފާތަކުން ބަލިވެ، ބަލި ޤަބޫލުކުރައްވައި މިއަދު މެމްބަރުންނަށް ފޮނުވި މެސެޖެއްގައި އެމަނިކުފާނު ވިދާޅުވީ 'ފިކުރެއްގެ ދިރުން' ނަމުގައި އުފައްދަވާ ގޮފިތައް ކުރިއަށް ގެންދަވާނީ އެޕާޓީން ވަކި ކުރި 39000 މީހުންނާއެކުގައި ކަމަށެވެ
"އަޅުގަނޑު ހުށަހަޅަނީ 'ފިކުރެއްގެ ދިރުން' ނަމުގައި އެމްޑީޕީގެ ގޮފިތައް ހުރިހާ ރަށެއްގައި ވެސް އަލުން ހަދައި، ކަނޑާލި 39،000 އަށް ވުރެ ގިނަ މީހުން އަލުން އެމްޑީޕީއާ ގުޅި، އެ މީހުންނާ އެކު އަޅުގަނޑުމެންނަށް ފެންނަ ގޮތް ނިންމުން" ނަޝީދު ވިދާޅުވިއެވެ.
ނަޝީދުގެ މި މެސެޖަށް ދެއްވި ޖަވާބުގައި އިކޮނޮމިކް މިނިސްޓަރުކަންވެސް ކުރައްވާ ފައްޔާޒު ވިދާޅުވީ ޕާޓީގެ އުސޫލާ ގަވާއިދު ބަދަލުކޮށް އެ ގޮތަށް ކަންކުރެވޭނެ ކަމަކަށް ޤަބޫލެއް ނުކުރެވޭކަމަށެވެ.
"އަލުން ތިކަމާ މެދު ވިސްނާލެއްވުމަށް އެދެން. ޕާޓީގެ އުސޫލާ ޤަވާއިދު ބަދަލުކޮށް ތި ގޮތަށް ކަންކުރެވޭނެ ކަމަކަށް ޤަބޫލެއް ނުކުރެވޭ،" ފައްޔާޒު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ، ރިޔާސީ އިންތިޚާބު އެމްޑީޕީގެ ރިޔާސީ ކެންޑިޑޭޓް ރައީސް ޞާލިޙަށް ކާމިޔާބު ނުކުރެވޭނެ ކަމަށެވެ. އަދި އެމަނިކުފާނާއި އެމަނިކުފާނުގެ ސަޕޯޓަރުން ތާއީދު ކުރާ ރިޔާސީ ކެންޑޭޓެއް ކަނޑައަޅާނީ ފަހުން ކަމަށް ވިދާޅުވިއެވެ. އެ ކެންޑިޑޭޓަކީ ރިޔާސީ އިންތިޚާބުގެ ކުރިން ޕާލިމަންޓަރި ނިޒާމަކަށް ބަދަލު ކުރަން އެއްބަސްވާ ކެންޑިޑޭޓަކަށް ވެއްޖެނަމަ ތާއީދު ކުރަން ފަސޭހަވާނެ ކަމަށް ވެސް ރައީސް ނަޝީދު ވިދާޅުވިއެވެ.
"ފިކުރެއްގެ ދިރުންގެ ފަރާތުން ތާއީދު ކުރާ ރިޔާސީ ކެނޑިޑޭޓެއް ކަނޑައަޅާނީ ފަހުން. ރިޔާސީ އިންތިޚާބުގެ ކުރިޔަށް ޕާލިމެންޓްރީ ނިޒާމަށް ބަދަލު ކުރުމަށް އެއްބަސްވާ ކެންޑިޑޭޓަކަށް ތާއީދު ކުރަން ފަސޭހަވާނެ ކެންޑިޑޭޓެއް." ރައީސް ނަޝީދު ވިދާޅުވިއެވެ.
ޕްރައިމަރީ ރައީސް ޞާލިޙް ވަނީ ވޯޓްލީ މީހުންގެ 61 އިންސައްތަ ކާމިޔާބު ކުރައްވާފައެވެ. އެއީ 24،572 ވޯޓެވެ.
ރައީސް ނަޝީދަށް ލިބިވަޑައިގަތީ 15،631 ވޯޓެވެ. އެމްޑީޕީގެ ޕްރައިމަރީގައި 57،255 މީހުންނަށް ވޯޓުލުމުގެ ހައްގު ލިބިފައިވާއިރު ވޯޓުލާފައިވަނީ 40،887 މީހުންނެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 71 ޕަަސެންޓެވެ.
