ރިޔާސީ އިންތިހާބަށް 200 އަށްވުރެ ގިނަ މުވައްޒަފުން ހޯދަނީ
ރިޔާސީ އިންތިހާބަށް، އިލެކްޝަން ކޮމިޝަންގެ ވަޒީފާއަށް 200 އަށްވުރެ ގިނަ މުވައްޒަފުން ހޯދަން އިއުލާންކޮށްފިއެވެ.
އިލެކްޝަން ކޮމިޝަން ވިދާޅުވީ ރިޔާސީ އިންތިހާބަށް ތައްޔާރުވުމަށް 203 މުވައްޒަފުން ހޯދަން މަސައްކަތްކުރަމުންދާކަމަށެވެ. މި ވަޒީފާތަަކަށް މީހުން ނަގާނީ ރިޔާސީ އިންތިހާބުގެ ނިޔަލަށެވެ.
ވަޒީފާތަކަށް ކުރިމަތިލާ ފަރާތްތަކަށް މަހަކު 4465 ރުފިޔާ ލިބޭނެއެވެ. އަދި ސާވިސް އެލަވަންސްގެ ގޮތުގައި މަހަކު 1500 ރުފިޔާގެ އިތުރުން މަސައްކަތަށް ނުކުންނަ ކޮންމެ ދުވަހަކަށް 155 ރުފިޔާ ލިބޭނެއެވެ.
ވަޒީފާގެ ޝަރުތުތަކުގެ ތެރޭގައި ސާނަވީ ނުވަތަ އެއާ އެއް ފެންވަރުގެ އިމްތިޙާނަކުން 2 މާއްދާއިން ދަށްވެގެން 'ޑީ' ގްރޭޑް ލިބިފައި ވުމާއެކު، އޭގެ އިތުރުން 'ސެކެންޑަރީ ސްކޫލް' ނުވަތަ 'ހަޔަރ ސެކަންޑަރީ ސްކޫލް' ސެޓްފިކެޓް އިމްތިޙާނުގައި 'ދިވެހި' މާއްދާއިން ދަށްވެގެން 'ސީ' ގްރޭޑް ލިބިފައިވުން ހިމެނެއެވެ.
އަދި އޮފިސަރ ލެވެލް މަޤާމެއް ނުވަތަ މަޤާމުގެ މަސައްކަތާއި ގުޅުންހުރި ދާއިރާއެއްގެ އެއަށްވުރެއް މަތީ މަޤާމެއްގައި މަސައްކަތްކޮށް 1 އަހަރުދުވަހުގެ ތަޖުރިބާ ލިބިފައިވުމާއި ވޭތުވެދިޔަ އިންތިޚާބެއްގައި، މަޤާމުގެ މަސައްކަތާއި ގުޅުންހުރި ދާއިރާއެއްގައި ޖީ.އެސް 3 ރޭންކެއްގައި މަސައްކަތްކޮށް ތަޖުރިބާ ލިބިފައިވުން ހިމެނެއެވެ.
އިލެކްޝަން ކޮމިޝަން ވިދާޅުވީ މި ވަޒީފާތަކަށް ކުރިމަތިލުމުގެ ސުންގަޑިއަކީ، އަންނަ އޭޕްރިލް 30 ވާ އާދީއްތަ ދުވަހުގެ 15:00 ކަމަށެވެ.
Ads by STO
