ދިހަ އަހަރު ފަހުން، ބަޣާވާތް އިއުލާނު ކޮށްފި: މޫސަ
ދިހަ އަހަރު ފަހުން، އެމްޑީޕީގެ ތެރޭގައި ބަޣާވަތް އިއުލާނު ކޮށްފައިވާ ކަމަށް އެ ޕާޓީގެ ކުރީގެ ޗެއާޕާސަން މޫސާ މަނިކު(ރީކޯ މޫސަ) ވިދާޅުވެއްޖެއެވެ.
މޫސަ މިހެން ވިދާޅުވީ ކުރެއްވި ޓްވީޓެއްގައެވެ. ރައީސް އިބްރާހީމް މުޙައްމަދު ޞާލިޙަށް ވަރަށް ބޮޑަށް ތާއީދު ކުރައްވާ މޫސަ މިފަދައިން ވިދާޅުވިއިރު، އެމްޑީޕީގެ ރިޔާސީ ޕްރައިމަރީން ބަލިވެވަޑައިގެންނެވި މުޙައްމަދު ނަޝީދު ވަނީ، "ފިކުރެއްގެ ދިރުން" މި ނަމުގައި ގޮފިތަކެއް ހެދުމަށް ނިންމަވައިފައެވެ. އެ މަނިކުފާނުގެ އަމާޒަކީ، އެ ގޮފިތަކަށް 50،000 މެމްބަރުން ހަަމަ ކުރުމެވެ.
އެކަމާ ގުޅިގެން މޫސަ ވިދާޅުވީ 10 އަހަރު ފަހުން ވެރިކަމާ ހެދި އެމްޑީޕީ ތެރޭ ބަޣާވާތް އިއުލާންކޮށްފައިވާ ކަމަށެވެ. ނަމަވެސް އެއީ ވާނެ ކަމެއް ނޫން ކަމަށް މޫސަ ވިދާޅުވިއެވެ.
ނަޝީދު މިއަދު ބަލި ގަބޫލުކުރައްވައި ވިދާޅުވީ ރައީސަށް ޕްރައިމަރީ ކާމިޔާބުކުރެއްވުނަސް މި އަހަރުގެ ރިޔާސީ އިންތިހާބު ކާމިޔާބެއް ނުކުރެއްވޭނެ ކަމަށެވެ.
ރައީސް ނަޝީދުގެ ވާހަކަތަކާ ގުޅިގެން އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވީ އަލުން އެކަމާ މެދު ވިސްނާލުން އެދިވަޑައިގަންނަވާ ކަމަށާއި ޕާޓީގެ އުސޫލާ ޤަވާއިދު ބަދަލުނުކޮށް، އެގޮތަށް ކަންކުރެވޭނެ ކަމަކަށް ޤަބޫލު ނުކުރައްވާ ކަމަށެވެ.
