ސިދާރްތު އާއި ކިއާރާގެ ކައިވެނި އޮންނާނެ ތަނާއި ތާރީހަކީ މިއީތަ؟
ބޮލީވުޑްގެ މަގުބޫލު ތަރިން ކަމުގައިވާ ސިދާރްތު މަލޯތުރާއާއި ކިއާރާ އަދުވާނީގެ ކައިވެންޏާބެހޭ ގޮތުން މީޑިޔާގައި ދޭތެރެ ދޭތެރެއިން ދަނީ ފަލަ ސުރުހީތައް ލިޔަމުންނެވެ. މިދެތަރިންގެ ކައިވެންޏަށް ގިނަ ބަޔަކު އިންތިޒާރު ކުރަމުންއަންނަ އިރު މި ދެތަރިން ކައިވެނި ކުރާނެ ކަމަށް ބެލެވޭ ތާރީހާއި ތަންވެސް މިހާރު ބައެއް މީޑިޔާތަކުގެ ފަލަ ސުރުހީއަށް ވަނީ އަރާފައެވެ.
ބޮލީވުޑްގެ ހަބަރުތައް ގެނެސްދޭ ބައެއް މީޑިއާތަކުން ބުނާގޮތުގައި ކިއާރާއި ކައިވެނި ކުރާނީ މި ފެބްރުއަރީމަހުގެ 4 ވަނަ ދުވަހާއި 6 ވަނަ ދުވަހާއި ދޭތެރޭގައެވެ. އަދި ކައިވެނީގެ ހަފްލާ އޮންނާނީ ޖޭސަލްމާގެ ސޫރީގަރ ޕެލަސްގައެވެ. އެހެންނަމަވެސް މިއިން އެއްވެސް ކަމެއް ކިއާރާ އަދި ސިދާރްތުވެސް ކަށަވަރުކޮށްދީފައެއް ނުވެއެވެ.
މީގެކުރިން ވެސް ހަބަރު ފެތުރިފައިވާ ގޮތުން ފެބްރުއަރީ މަހުގެ 4 ނޫނީ 5 ގައި ހިންދޫންގެ ކައިވެނީގެ ތައްޔާރީ ހަފްލާއެއްކަމުގައިވާ މެހެންދީ، ހަލްދީ އަދި ސަންގީތު އޮންނާނެއެވެ. އަދި ދެތަރިން ކައިވެނި ކުރާނީ ފެބްރުއަރީ މަހުގެ 6 ވަނަ ދުވަހު ކަމަށްވެސް އެނޫހުން ވަނީ ބުނެފައެވެ. އަދި މި ދެތަރިން ކުރާނީ ރޯޔަލް ކައިވެންޏެއްކަމަށްވެސް ހަބަރުތައް ބުނެއެވެ. އަދި މިކައިވެންޏަކީ ހައި ސެކިއުރިޓީ ކައިވެންޏެއްކަމަށާއި މިކައިވެނީގެ ސެކިއުރިޓީ ބަލަހައްޓާ އޮފިޝަލުން ކައިވެނި އޮންނާނެ ކަމަށް ބެލެވޭ ސިޓީއަށް ފެބްރުއަރީ މަހުގެ 3 ވަނަ ދުވަހު ދާނެ ކަމަށްވެސް ވަނީ ހަބަރު ލިބިފައެވެ.
