ރިޔާސީ އިންތިޚާބު 2023: 30 މީހުން ވޯޓުލާނަމަ، ރިސޯޓުތަކުގައި ވޯޓު ފޮށި ބަހައްޓާނެ
މި އަހަރު ބޭއްވުމަށް ހަަމަޖެހިފައިވާ ރިޔާސީ އިންތިޚާބުގައި 600 އަށްވުރެ ގިނަ ވޯޓު ފޮށި ބަހައްޓަން ޖެހޭނެ ކަމަށާއި، 30އަށް ވުރެ ގިނަ މީހުން ވޯޓުލާ ރިސޯޓްތަކުގައިވެސް ފޮށި ބަހައްޓާނެ ކަމަށް އިލެކްޝަން ކޮމިޝަންގެ ނައިބު ރައީސް އިސްމާޢިލް ހަބީބް ވިދާޅުވެއްޖެއެވެ.
ހަބީބު މި ފަދައިން ވިދާޅުވެފައިވަނީ އޮންލައިން ނޫން "އަވަސް"އަށް ދެއްވި ބަސްދީގަތުމެއްގައެވެ.
ހަބީބު ވިދާޅުވި ގޮތުގައި، މި އަހަރުގެ ސެޕްޓެމްބަރު މަހުގެ 9 ވަނަ ދުވަހު ބާއްވާ އިންތިޚާބުގައި، ރިސޯޓުތަކުގައި މަސައްކަތްކުރާ މުވައްޒަފުންނަށް ފަސޭހަކުރުމަށް ރިސޯޓުތަކުގައި ބަހައްޓާ ވޯޓުފޮށި އިތުރުކޮށްފައިވާ ކަމަށެވެ.
ރިސޯޓުތަކުގައި ވޯޓު ފޮށި ބެހެއްޓޭނީ މަދުވެގެން 30 މީހުންގެ ރަޖިސްޓްރީ ކުރުމުން ކަމަށްވެސް އޭނާ ވިދާޅުވިއެވެ. އަދި ރިސޯޓެއްގައި ވޯޓު ލުމަށް 30 މީހުން ރަޖިސްޓްރީ ކުރިއަސް، އެ ރިސޯޓެއްގައި ވޯޓު ފޮށި ބެހެއްޓޭނީ އެ މާހައުލަކީ ވޯޓު ފޮށި ބެހެއްޓުމަށް ރައްކާތެރި ތަނަކަށްވާނަމަ ކަމަށްވެސް ހަބީބު ވަނީ ވިދާޅުވެފައެވެ.
މި އަހަރުގެ ރިޔާސީ އިންތިޚާބަށް 90 މިލިއަން ރުފިޔާގެ ބަޖެޓެއް ވަނީ ކަނޑައަޅައިފައެވެ. މި ފަހަރުގެ އިންތިޚާބަށް 8،000 އޮފިޝަލުން ބޭނުންވާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީޤު ކުރިން ވިދާޅުވެފައިވެއެވެ.
