ފައްސިވެ ފެސިލިޓީތަކަށް ނުގެންދެވި 334 މީހުން މިވަގުތު އެބަތިބި: ޑރ. ނަޒްލާ
ކޮވިޑް-19އަށް ފައްސިވެ، އައިސޮލޭޝަން ފެސިލިޓީތަކަށް ނުގެންދެވި 334 މީހުން މިވަގުތު އެބަތިބި ކަމަށް ހެލްތް އެމްޖެންސީ އޮޕަރޭޝަން ސެންޓަރު(އެޗްއީއޯސީ)އިން ބުނެފިއެވެ.
ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ވިދާޅުވީ އެކްޓިވް ކޭސްތަކުގެ ތެރެއިން ބަލިން ރަނގަޅުވާ މީހުންގެ މަޢުލޫމާތު، ސިސްޓަމަށް އެޅުމުގައި ލަސްތައް ހުރިކަމަށެވެ. އަދި ފެސިލިޓީތަކަށް 700 އެއްހާ މީހުން ނުގެންދެވި ތިބިކަމަށް ދައްކަނީ މިސަބަބަށްޓަކައި ކަމަށްވެސް ޑރ. ނަޒްލާ ވިދަޅުވިއެވެ.
ނަމަވެސް މިކަންކަން ޙައްލުކޮށް ތަފާސް ހިސާބުތައް އަޕްޑޭޓްކުުރުމުގެ މަސައްކަތް ކުރަމުންދާކަމަށް ޑރ. ނަޒްލާ ވިދާޅުވިއެވެ.
"މިވަގުތު ފެސިލިޓީއަށް ނުގެންދެވި ތިބީ 334 މީހުން. ހިސާބު ދިމާނުވަނީ ބަލިން ރަނގަޅުވެ ދޫކޮށްލާ މީހުންގެ މަޢުލޫމާތު ސިސްޓަމަށް އެޅުން ލަސްވާތީ." ނަޒްލާ ވިދާޅިވިއެވެ.
ޑރ. ނަޒްލާ ވިދާޅުވީ ބައްޔަށް ޕޮސިޓިވްވާ މީހުންގެ ޢަދަދު އިތުރުވުމާއެކު، ކޮންޓެކްޓް ޓްރޭސިންގެ މަސައްކަތާއި ބަލިމީހުންގެ ކަންކަން ބެލެހެއްޓުމުގައި އުޅޭ ޓީމްތަކުގެ މަސައްކަތްތައް ވެސް އިތުރުވެފައިވާކަމަށެވެ. އަދި ކަރަންޓީން ފެސިލިޓީތައް މާލެއާ ދުރުވުމާއި، ދަތުރުފަތުރުގެ ނިޒާމު އޮންނަ ގޮތުންވެސް މީހުން ފެސިލިޓީއަށް ގެންދިއުމުގައި ލަސްތަކެއް އުޅޭކަމަށެވެ.
