ތުރުކީ-ސީރިއާއަށް އެހީވުމުން، ޣިޔާސުއްދީން ސްކޫލްގެ ދަރިވަރުންނަށް މިނިސްޓަރު އިމްރާންގެ ހެޔޮ ދުޢާ
ޣިޔާސުއްދީން ސްކޫލްގެ ދަރިވަރުންގެ ފަރާތުން، ތުރުކީ-ސީރިއާ ބިންހެލުމާ ގުޅިގެން ހާލުގައި ޖެހުނު މީހުންނަށް އެހީވުމަށް 50،000 ރުފިޔާ ހަދިޔާ ކުރުމުން ހޯމް މިނިސްޓަރު އިމްރާން އަބްދުﷲ، އެ ސްކޫލްގެ ދަރިވަރުންނަށްޓަކައި ހެޔޮ ދުޢާ ކުރައްވައިފިއެވެ.
ޣިޔާސުއްދީން ސްކޫލުން މަޢުލޫމާތުދޭ ގޮތުގައި އެ ފައިސާއަކީ އެ ސްކޫލުގެ ގްރޭޑް 8 އަދި 9ގެ ދަރިވަރުން 2019 އަދި 2022 ވަނަ އަހަރު ބޭއްވި އޭބީއީ ފެއާއިން ލިބުނު ފައިސާއެވެ.
އެ ފައިސާ ހަދިޔާކޮށްފައި ވަނީ އިއްޔެ ބޭއްވި ސްކޫލް އެސެމްބްލީގައި، ތުރުކީ އަދި ސީރިއާއަށް މިހާރުވެސް އެހީތެރިކަން ފޯރުކޮށްދެމުން އަންނަ ރާއްޖޭގެ އިންޓަނޭޝަނަލް އެއިޑް ކެމްޕެއިނާއެވެ.
މިކަމާ ގުޅިގެން އަދާލަތު ޕާޓީގެ ރައީސްގެ މަޤާމުގައި ހުންނެވި އިމްރާން ކުރެއްވި ޓްވީޓެއްގައި ވަނީ މާތްﷲ އެ ދަރިވަރުންނާއި، ދަރިވަރުންގެ ބެލެނިވެރިންނާއި، ސްކޫލްގެ މެނޭޖްމަންޓަށްވެސް ހެޔޮ ރަޙްމަތް ލެއްވެވުން އެދި ދުޢާ ކުރައްވައިފައެވެ.
"އަދި މި ދަރިވަރުންނަކީ ޢިލްމީ ގޮތުން މޮޅު، ހުނަރުވެރި، ޤާބިލް، އަދި ދެ ދުނިޔޭގައިވެސް ކާމިޔާބު ބައެއް ކަމުގައި ލައްވާންދޭވެ!"
