ރައީސްކަމުގެ ހުވާ ފައިސަލް ކުރެއްވި ދުވަހުން ފެށިގެން އެއީ ރާއްޖޭގެ ރައީސް: އާދަމް ޝަރީފު

ރާއްޖޭގެ ރައީސުލްޖުމްހޫރިއްޔާ ކަމުގެ ހުވާ ރައީސުލްޖުމްހޫރިއްޔާގެ ނައިބު ފައިސަލް ނަސީމް ކުރެއްވި ދުވަހުން ފެށިގެން އެމަނިކުފާނަކީ ރާއްޖޭގެ ރައީސުލްޖުމްހޫރިއްޔާކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ވިދާޅުވެއްޖެއެވެ.

Ads by Sosun Fihaara

އާދަމް ޝަރީފު މިއަދު ކުރެއްވި ޓްވީޓެއްގައި ވިދާޅުވީ އެދުވަހުންފެށިގެން ރާއްޖޭގައި ރިޔާސީ ބަޔާން އިއްވަވަން ޖެހޭނީ ފައިސަލް ނަސީމު ކަމަށެވެ.

"ރައީސުލްޖުމްހޫރިއްޔާ ކަމުގެ ހުވާ ނައިބު ރައީސް ކުރެއްވި ދުވަހުންފެށިގެން ރައީސުލްޖުމްހޫރިއްޔާއަކީ އޮނަރަބަލް ފައިސަލް ނަސީމް ކަމަށާއި ރިޔާސީ ބަޔާން އިއްވަންޖެހޭނީ ވެސް އޮނަރަބަލް ފައިސަލް ނަސީމް ކަމަށް ގިނަ ބަޔަކު ޤަބޫލު ކުރާ މައްސަލައަށް ޤާނޫނީ ފަރުވާއެއް ބޭނުންވޭ. އެމަސައްކަތް ޕީޕީއެމްގެ ލޯޔަރުން އެބަ ކުރައްވާ" އާދަމް ޝަރީފު ވިދާޅުވިއެވެ.

ނައިބު ރައީސް ފައިސަލް، ރައީސުލްޖުމްހޫރިއްޔާ ކަމުގެ ހުވާ ކުރެއްވީ މިދިޔަ ފެބްރުއަރީ މަހުގެ 25 ވަނަ ދުވަހުއެވެ.

އެ މަނިކުފާނު ރައީސް ކަމުގެ ހުވާ ކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ތައިރޮއިޑްގެ ފަރުވާއަށް ސިންގަޕޫރުގައި ކުރެއްވި އޮޕަރޭޝަނެއް ކުރެއްވުމަށްޓަކައެވެ.

ޤާނޫނު އަސާސީގެ 123 ވަނަ މާއްދާގައި ވަނީ ރައީސުލް ޖުމްހޫރިއްޔާ މަޤާމުގެ މަސްއޫލިއްޔަތުތަކާއި ވާޖިބުތަށް އަދާކުރެއްވުމަށް ވަގުތީގޮތުން އުޒުރުވެރިވާނަމަ، ސަބަބު ބަޔާންކޮށް އެކަން ރައްޔިތުންގެ މަޖިލީހުގެ ރައީސަށް ލިޔުމަކުން އެންގުމަށްފަހު ނައިބް ރައީސާ އެ މަސްއޫލިއްޔަތުތައް ހަވާލުކުރަންވާނެ ކަމަށެވެ.

އަދި އެ މަސްއޫލިއްޔަތުތަކާއި ވާޖިބުތަކާ އަލުން ހަވާލުވެވޭނީ ވެސް ރައްޔިތުން މަޖިލީހުގެ ރައީސަށް އެކަން ލިޔުމަކުން އެންގުމަށްފަހު ކަމަށް ވެސް އެ މާއްދާގައިވެއެވެ.