އާދައިގެ ކުށް ކުރާ މީހުންނަށް ވާނުވާ ބަންދެއް ނުޖަހާނެ: އިމްރާން
"އާދައިގެ ކުށް" ކޮށްގެން ހައްޔަރުކުރާ އެއްވެސް މީހަކަށް މިހާރު ވާނުވާ ބަންދު ނުވަތަ ޝަރީއަތް ނިމެންދެން ބަންދުކުރުމަށް މުއްދަތު ނުޖަހާނެ ކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކާށިދޫ ދާއިރާގެ މެމްބަރު އަބްދުﷲ ޖާބިރު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު އިމްރާން ވިދާޅުވީ މިހާރު ޝަރީޢަތް ނިމެންދެން ބަންދުކޮށްފައި ނުވަތަ ވާނުވާ ބަންދު ޖަހާފައިތިބޭނީ ބޮޑެތި ކުށްތަކުގައި ހައްޔަރުކުރާ މީހުން ކަމަށެވެ.
"ޝަރީއަތް ނިމެންދެން މިހާރު ބަންދުކޮށްފައި ތިބޭނީ މައިގަނޑުގޮތެއްގައި ގޭންގު މާރާމާރީތައް ނުވަތަ މީހެއްގެ މަރާއި ގުޅުން ހުރި މައްސަލަތަކުގައި ނޫނީ ޑްރަގްގެ ވިޔަފާރި ކުރުމުގެ މައްސަލަތަކުގައި ނޫނީ ކުޑަކުދިންނަށް ޖިންސީ ފުރައްސާރަކޮށްފައިވާ މައްސަލަތަކުގައި މިމައްސަލަތައް ނޫން އާދައިގެ އާއްމުކޮށް މިކިޔާ މައްސަލަތަކުގައި މިހާރު ވާނުވާ ނުވަތަ ޝަރީއަތް ނިމެންދެއް ބަންދުގައި މިހާރު ނުބައިތިއްބާނެ" މިނިސްޓަރ ވިދާޅުވިއެވެ.
މިނިސްޓަރު ވިދާޅުވީ ވާނުވާ ބަންދު ޖަހާފައިވާ މީހުންގެ ބަންދުގެ މައްސަލައިގައި މަހަކު އެއްފަހަރު ނުވަތަ ދެފަހަރު ޕްރޮސެކިއުޓަރ ޖެނެރަލާއި ބައްދަލު ކުރައްވާކަމަށާއި ވާނުވާ ބަންދުގައި ތިބި މީހުންގެ ތެރެއިން ކިރިޔާވެސް ދޫކޮށްލެވެން ހުރި މީހެއްނަމަ ދޫކޮށްލުމުގެ މަސައްކަތް މަހަކު އެއްފަހަރު ކުރައްވާކަމަށެވެ.
"އަޅުގަނޑުމެން މަހަކު އެއްފަހަރު ނުވަތަ ދެފަހަރު ޕްރޮސެކިއުޓަރ ޖެނެރަލް އާއި އެބަ ބައްދަލުކުރަން ޝަރީއަތް ނިމެންދެން ބަންދުކޮށްފައި ތިބޭ މީހުންގެ ތެރެއިން ކިރިޔާވެސް ދޫކޮށްލެވެން ހުރި މީހެއްވިއްޔާ ދޫކޮށްލުމުގެ މަސައްކަތް މަހަކު އެއްފަހަރު އަޅުގަނޑުމެން ޕްރޮސެކިއުޓަރ ޖެނެރަލްއާއެކު އެބަ ކުރިއަށް ގެންދަން" އިމްރާން ވިދާޅުވިއެވެ.
އިމްރާން އިތުރަށް ވިދާޅުވީ ވާނުވާ ބަންދު ޖަހާފައިވާ މީހުން ދޫކޮށްލުމުގައި ލަސްވަނީ ބޮޑެތި ކުށް ކުރާ މީހުން ގިނަވުމުގެ ސަބަބުންނާއި ޝަރުއީ މަރުހަލާ ދިގުދެމިގެން ދާތީކަމަށެވެ.
އަދި އެފަދަ ފަރާތްތައް ދޫކޮށްލާއިރު އެކަމަކީ ގަބޫލު ކުރެވޭކަމަކަށް ނުވާތީ އެކަމުގެ ހައްލަކަށް އޮތީ ބަންދުކުރެވިފައި ތިބި ފަރާތްތަކުގެ މައްސަލަތަކުގެ ޝަރީއަތް އަވަހަށް ނިމިގެން ދާނެފަދަ ގޮތަކަށް އިންތިޒާމުތައް ހުރުން ކަމުގައި ޤަބޫލު ކުރައްވާކަމަށް މިނިސްޓަރު އިމްރާން ފާހަގަ ކުރެއްވިއެވެ.
