މިއަހަރު ސްޓެލްކޯގެ ފަރާތުން 2 މުވައްޒަފެއް ހައްޖަށް، އިތުރު 2 މުވައްޒަފުން އުމްރާއަށް!
މިއަހަރު ސްޓެލްކޯގެ ފަރާތުން އެކުންފުނީގެ 2 މުވައްޒަފަކަށް ހައްޖަށް ދިޔުމުގެ ފުރުސަތުދީ އިތުރު 2 މުވައްޒަފުން އުމްރާއަށް ދިޔުމުގެ ފުރުސަތު ދީފިއެވެ.
ސްޓެލްކޯ އިން މައުލޫމާތު ދެއްވި ގޮތުގައި 1444 ވަނަ އަހަރުގެ ހައްޖު އަދި އުމްރާގެ އަޅުކަމުގެ ފުރުސަތު ލިބޭ މުވައްޒަފުން ގުރުއަތުން ހޮވާފައިވަނީ ބުދަ ދުވަހުގެ ރޭ ކުޑަގިރީގައި މިއަހަރުގެ އަންހެނުންގެ ދުވަސް ފާހަގަ ކުރުމަށާއި، ރަމަޟާން މަހަށް މަރުހަބާ ކިއުމުގެ އިތުރުން، ކުންފުނިންދޭ ހައްޖު އަދި އުމްރާގެ ފުރުސަތަށް ގުރުއަތު ނެގުމަށް ބޭއްވި ހާއްސަ ރަސްމިއްޔާތުގައެވެ.
ހައްޖާއި އުމުރާގެ އަޅުކަން އަދާ ކުރުމަށް އެކުންފުނިން، އެކުންފުނީގެ އަންހެން މުއައްޒަފުންނާއި ފިރިހެން މުއައްޒަފުންނަށް ވަކިން ހުޅުވާލި ފުރުސަތުގެ ތެރެއިން ޙައްޖުގެ އަޅުކަން އަދާކުރުމަށް އެދި ހުށަހެޅި މުވައްޒަފުންގެ ތެރެއިން ޝަރުތު ފުރިހަމަވެފައި ވަނީ ފިރިހެން 96 މުވައްޒަފުންނާއި އަންހެން 22 މުވައްޒަފުންނެވެ. އަދި ޢުމުރާގެ އަޅުކަން އަދާކުރުމަށް އެދި ހުށަހެޅި މުވައްޒަފުންގެ ތެރެއިން ޝަރުތު ފުރިހަމަވެފައި ވަނީ ފިރިހެން 262 މުވައްޒަފުންނާއި އަދި އަންހެން 56 މުވައްޒަފުންނެވެ.
އެކުންފުނިން އިތުރަށް ބުނީ މުވައްޒަފުންގެ މެދުގައި ޤުރުއަތުލައިގެން ހައްޖުގެ އަޅުކަން އަދާކުރުމަށް ފިރިހެން މުވައްޒަފުންގެ ތެރެއިން ހޮވިފައި ވަނީ ، ޓްރާންސްމިޝަން، އެންޑް ޑިސްޓްރިބިއުޝަން ޑިޕާޓްމަންޓްގެ ޢަބްދުﷲ ޝަރީފް ކަމަށާއި އަންހެން މުވައްޒަފަކަށް ހޮވިފައިވަނީ، ފައިނޭންސް އެންޑް އެކައުންޓްސް ޑިޕާޓްމަންޓް. ޙަދީޖާ ތައުފީޤާ ކަމަށެވެ. އަދި އުމްރާގެ އަޅުކަން އަދާކުރުމަށް ހޮވިފައިވާ ފިރިހެން މުވައްޒަފަކީ ސާރވިސް ސެންޓަރުގެ ޝާހުލް ހަމީދު ކަމަށާއި އަންހެން މުވައްޒަފަކަށް ހޮވިފައިވަނީ، ޕްރޮކިއުމަންޓް ޑިޕާޓްމަންޓްގެ ފާތިމަތު ރިޒްނާކަމަށް އެކުންފުނިން ބުނެއެވެ.
