ސަރުކާރުން އެއްވެސް މީހަކަށް ވަޒީފާގެ ބިރެއް ނުދައްކާނެ: މިއުވާން ‏

ސަރުކާރުން އެއްވެސް މީހަކަށް ވަޒީފާގެ ބިރު ނުދައްކާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

Ads by Sosun Fihaara

މިއުވާން ބޭއްވި ނޫސްވެރިންގެ ބައްދަލުވުމުގައި މިއުވާން ވިދާޅުވީ، ސަރުކާރުގެ ވަޒީފާތަކުގައި ތިބި މީހުންނަށް ވަޒީފާގެ ބިރެއް ނޯންނާނެ ކަމަށެވެ. އަދި މިފަހުން ވަޒީފާއިން ވަކިކޮށްފައި ވަނީ، ސިޔާސީ މަޤާމުތަކުގައި ތިބި މީހުން ކަމަށްވެސް އޭނާ ވިދާޅުވިއެވެ.

މީގެ އިތުރުން މިއުވާން ވިދާޅުވީ ސިޔާސީ މަގާމެއްގައި ހުންނަ މީހަކު ހެނދުނު އޮފީހަށް ނުކުމެ ވަކި ސިޔާސަތެއް ދަމަހައްޓާފައި، މެންދުރުފަހު އެހެން ސިޔާސަތެއް ދެމެގެއްޓުމަށް މަސައްކަތް ކުރުމަކީ ސިޔާސީ ކަންކަން ކުރަން ނޭނގުންކަން ފާހަގަކުރައްވައި، މިއުވާން ވިދާޅުވީ، ސިޔާސަތު ޤަބޫލު ނުކުރާ ބަޔަކާއެކު މަސައްކަތް ނުކުރެވޭނެ ކަމަށެވެ.

އޭނާ އިތުރަށް ވިދާޅުވީ ޤާނޫނާ ޚިލާފު ކަމެއް ކުރާނަމަ، އެއްވެސް ޕާޓީއެއްގެ މީހަކަށް ވަޒީފާގައި ނުހުރެވޭނެ ކަމަށެވެ. އަދި ކޯލިޝަން ދެމެހެއްޓުމަށް ރައީސް އިބްރާހީމް މުޙައްމަދު ސާލިޙު ގެންދަވަނީ މަސައްކަތް ކުރައްވަމުން ކަމަށް ވެސް ވިދާޅުވިއެވެ.

އެމްޑީޕީގެ ރިޔާސީ ޕްރައިމަރީއަށް ފަހުގައި، އެ ޕާޓީގެ ތެރޭގައި ދެ ފެކްޝަނެއް އުފެދި، ރައީީސް މުޙައްމަދު ނަޝީދު ފަޅިއަށް އަރައިވަޑައިގެންނެވި ބޭފުޅުން ދަނީ މަޤާމުތަކުން ވަކި ކުރަމުންނެވެ.

އެގޮތުން ރައީސް އޮފީހުގެ މިނިސްޓަރުގެ މަޤާމުގައި ހުންނެވި އެމްޑީޕީގެ ނައިބު ރައީސް މުޙައްމަދު ޝިފާޒްގެ އިތުރުން އެސްޓީއޯގެ އެމްޑީ ހުސެއިން އަމްރު ހިމެނެއެވެ.