ރޮޒައިނާ ރައީސް ނަޝީދަށް: މަޖިލީހުގެ ރައީސް ކަމަށް ވަޑައިގެން، އެތަންވެސް ޕާޓީ ކުރާ އައްޑާއަކަށް ބަދަލުކޮށްފި
ރައީސް ނަޝީދަށް މިހާރުވެސް ދައުލަތުން ބޮޑު ހަރަދެއް ކުރަން ޖެހޭކަމަށާއި ރައްޔިތުންގެ ފައިސާއިން ކުރީގެ ރައީސްގެ އިނާޔަތާ، މަޖިލިސް ރައީސްގެ މުސާރަޔާ ހުރިހާ އެއްޗެއް ނަގައިގެންހުރެ އެމަނިކުފާނު ކުރައްވާކަމަކީ މުޅި ޤައުމުގައި ފިތުނަ އުފެއްދުން ކަމަށް ވިދާޅުވެ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ރައީސް ނަޝީދަށް ބޮޑެތި ފާޑު ކިޔުންތަކެއް އަމާޒުކޮށްފިއެވެ.
ރޮޒައިނާ ވިދާޅުވީ ރައީސް ނަޝީދު މަޖިލިސް ރައީސް ކަމަށް ވަޑައިގެން މުޅި މަޖިލީހުގެ ހިންގުން އެއްކޮށް ހަރާބުކޮށްލާފައިވާކަމަށެވެ.
"މިބޭފުޅާގެ މި އުޅުމަށް މަގުފަހިކޮއްދޭން ކޮންމެ އަހަރަކު ދައުލަތުން އެތައް މިލިއަން ރުފިޔާ ޚަރަދު ކުރަން އެބަޖެހޭ. މަޖިލީހުގެ ރައީސް ކަމަށް ވަޑައިން މުޅި މަޖިލީހުގެ ހިންގުން އެއްކޮށް ހަރާބުކޮށް ތިމަންނާއޭ މަޖިލިސް ޤަވައިދަކީ ބުނެ އެތަންވެސް އަނެއް ޕާޓީކުރާ އައްޑާއަށް ބަދަލުކޮށްފި!" ރޮޒައިނާ ވިދާޅުވިއެވެ.
އެމްޑީޕީގެ ރިޔާސީ ޕްރައިމަރީއަށްފަހު އެޕާޓީގެ އެތެރޭގެ ހަމަނުޖެހުންތައް ބޮޑުވެފައިވާއިރު، މެމްބަރު ރޮޒައިނާ ގެންދަވަނީ ރައީސް ނަޝީދަށް ބޮޑެތި ފާޑުކިޔުންތަކެއް އަމާޒުކުރައްވަމުންނެވެ. އަދި ނަޝީދަށް ތާއީދުކޮށް، ޓްވިޓާގައި ޙިޔާލުފާޅު ކުރަމުން އަންނަ "ހަސަން ކުރުސީ" ޓްވިޓަރ އެކައުންޓަކީވެސް ރައީސް ނަޝީދުގެ އެކައުންޓެއްކަމަށް ރޮޒައިނާ ގެންދަވަނީ ތުހުމަތު ކުރައްވަމުންނެވެ.
އެހެންނަމަވެސް "ހަސަން ކުރުސީ" ޓްވިޓަރ އެކައުންޓުގެ އަސްލު ހޯދައި ދެއްވުމަށް ރައީީސް ނަޝީދު ފުލުހުންގެ ކިބައިން މިއަދުވަނީ އެދިވަޑައިގެންފައެވެ.
Ads by STO
