ކޮވިޑާ ގުޅިގެން ކުރި ޖޫރިމަނާގެ އަދަދު 1.1 މިލިއަނަށް
ކޮވިޑާ ގުޅިގެން ސަރުކާރުން އެޅި ފިޔަވަޅުތަކާ ހިލާފުވެގެން ކުރި ޖޫރިމަނާގެ އަދަދު 1.1 މިލިއަން ރުފިޔާއަށް އަރައިފި އެވެ.
ހެލްތް އިމަޖެންސީ އޮޕަރޭޝަން ސެންޓަރުން ރޭ ބޭއްވި ނޫސްވެރިންގެ ބައްދަލުވުމުގައި، ޗީފް އިންސްޕެކްޓަރ އޮފް ފޮލިސް އަބްދުލް މަތީން އަބްދުލް ކަރީމް ވިދާޅުވީ މާލޭ ސަރަޙައްދުގައި އާއްމު ތަންތަނަށް ނުކުންނައިރު މާސްކު އެޅުން މަޖުބޫރުކުރި ފަހުން، އުޞޫލާއި ޚިލާފުވެގެން މިހާތަނަށް 189 މީހަކަށް ފުލުހުން ނަސޭހަތްތެރިވެފައި ވާކަމަށެވެ. އަދި މާސްކު ނާޅާ އާއްމު ތަންތަނަށް ނުކުތް 591 ފަރާތެއް މިހާތަނަށް އައިއިރު ޖޫރިމަނާކޮށްފައި ވާކަމަށް އަބުދުލްމަތީން އަބްދުލްކަރީމް ވިދާޅުވިއެވެ.
އޭނާ ވަނީ މަނާ ގަޑިތަކުގައި ބޭރުގައި އުޅޭ ފަރާތްތައް މަދުވަމުން އަންނަކަން ފާހަގަކޮށްފައެވެ. އެގޮތުން ރޭގަނޑު 10 އިން ފެށިގެން ފަތިހު 5 ޖެހުމާއި ހަމައަށް މަގުމަތީގައި އެއްޗެހި ދުއްވުމާއި، މީހުން ނުކުމެ އުޅުން މަނާކޮށްފައިވާއިރު، މިހާތަނަށް އައިރު 1519 ނަސޭހަތްދީ 527 ފަރާތެއް ޖޫރިމަނާ ކޮށްފައިވާކަމަށެވެ.
އެޗްޕީއޭއިން ވަނީ، މިމަހުން ފެށިގެން މާސްކު އެޅުން މަޖުބޫރުކޮށް، ރޭގަނޑު 10:00 އިން ފަތިހު 5:00 އަށް ކާފިއު ވަގުތުގެ ގޮތުގައި ކަނޑައަޅާފައެވެ. މާސްކު ނާޅާ އަދި ކާފިއު ވަގުތުގައި ބޭރުގައި އުޅޭ ނަމަ، ޖޫރިމަނާ ކުރާ އަދަދަކީ، 1،000 ރުފިޔާއެވެ.
