ކޮވިޑްގެ ދުވަސްވަރު ކުރަން އެންމެ ރަނގަޅުކަމަކީ މީހުން ހެއްވުން: ސުނީލް ގްރޯވަރ
ކޮވިޑްގެ ނުރައްކާތެރިކަން މުޅި ދުނިޔެއަށް ފެތުރިފައިވާއިރު، މިދުވަސްކޮޅު ކުރަން އެންމެ ރަނގަޅު ކަމަކީ މީހުން ހެއްވުން ކަމުގައި ބޮލީވުޑްގެ މަޝްހޫރު ކޮމީޑިއަން ސުނީލް ގްރޯވަރ ބުނެފިއެވެ.
ސުނީލް ބުނެފައިވަނީ އޭނާ މިހާރު ހަރަކާތްތެރި ވަމުން އަންނަ "ގޭންގްސް އޮފް ފިލްމިސްތާން" ޝޯގައި މަސައްކަތް ކުރުމުގެ ފުރުސަތު ހަމަލިބުމާއެކު އޭނާ އެފުރުސަތުގެ ބޭނުން ހިފިކަމަށެވެ. އެއީ މިދުވަސްވަރަކީ އެންމެންނަށް ވެސް ހިނިތުންވެ އުފާވާން ނުހަނު މުހިންމު ދުވަސްކޮޅެއް ކަމުގައި އޭނާއަށް ފެންނަ ކަމަށްވެސް ސުނީލް ބުނެފައިވެއެވެ.
"މިއީ އެހާވެސް ފަސޭހަ ކަމެއްނޫން. ޕެންޑަމިކްގެ މިދުވަސްކޮޅު މީހުން ހެއްވުމަކީ ވެސް ޗެލެންޖެއް. އެކަމަކު އަހަރެން ހަމަ ވަގުތުން މިހުށަހެޅުން ޤަބޫލުކުރީ އެއީ އަހަންނަށް ފެންނަ ގޮތުގައި މިދުވަސްކޮޅު މިފަދަ ޝޯއެއް ބެލުން އެންމެންނަަށް ވެސް ވަރަށް ބޭނުންތެރި. މީހުން ހެއްވުމަކީ އަހަރެން އަބަދުވެސް ހިތުގެ އެންމެ ފުންމިނުން ކުރަން ބޭނުންވާ ކަމެއް" ސުނީލް ބުނެފައިވެއެވެ.
މީގެއިތުރުން ސުނީލް ބުނީ މިޝޯއިން އޭނާއަށް ލިބޭ އާމްދަނީ، ޗެރިޓީއަށް ހަދިޔާ ކުރާނެ ކަމަށެވެ.
"މިޝޯއިން އަހަންނަށް ލިބޭ ހުރިހާ އާމްދަނީއެއް އަހަރެން ހަދިޔާ ކުރާނީ ޗެރިޓީއަށް. މިދުވަސްވަރަކީ އެންމެންވެސް އެކަކު އަނެކަކަށް އެހީތެރިވާންވީ ދުވަސްވަރު" ސުނީލް ބުނެފައިވެއެވެ.
ގޭންގްސް އޮފް ފިލްމިސްތާނުގައި ސުނީލް ގްރޯވަރ ފެނިގެންދާނީ "ޑޯން" އެއްގެ ގޮތުގައެވެ. އޭނާއާއެކު މިޝޯގައި ބެލުންތެރިން މުނިފޫހިފިލުވުމަށް މަސައްކަތް ކުރާނީ ޝިލްޕާ ޝިންޑޭ، ސަންކެޓް ބޯސާލޭ، އުޕާނާ ސިންގް، ސުގާންދާ މިޝްރާ، ޕަރިތޯޝް ތުރިޕާތީ، ޖަތިންދްރަ ސޫރީ އަދި ސިދާތު ސާގަރް އެވެ.
