މަޖިލީހުގެ މިއަހަރުގެ ދެ ވަނަ ދައުރު ބުރާސްފަތި ދުވަހު ފަށަނީ
ރައްޔިތުންގެ މަޖިލީހުގެ މިއަހަރުގެ ދެ ވަނަ ދައުރުގެ އަންނަ ބުރާސްފަތި ދުވަހު ފަށާނެ ކަމަށް މަޖިލީހުގެ އިދާރާއިން ވިދާޅުވެއްޖެއެވެ.
މަޖިލީހުގެ ފުރަތަމަ ދައުރު ނިމިގެން ދިޔައިރުގައި އެންމެ ބޮޑަށް ފެންމަތިވެފައި އޮތް މައްސަލައަކީ ޕްލާސްޓިކް ކޮތަޅުން ފީ ނަގަން ފެށުމުން އުފެދުނު މައްސަލަތައް ޙައްލު ކުރަން ކުނި މެނޭޖް ކުރުމުގެ ޤާނޫނަށް އިޞްލާޙު ގެނައުމުގެ ބިލުގެ މައްސަލައެވެ. އެހެންނަމަވެސް މަޖިލިސް ޗުއްޓީއަށް ދިޔައީ އެ ބިލު، ދިރާސާ ކުރުމަށް ކޮމީޓީއަށް ވެސް ނުފޮނުވައެވެ.
ޗުއްޓީއަށްފަހު މަޖިލީހުގެ ދެވަނަ ދައުރުގެ ޖަލްސާތައް ފެށުމަށް ތައްޔާރުވެފައިވާއިރު ޗާގޯސް މައްސަލައިގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އާއި ބަންޑާރަ ނައިބު އިބްރާހީމް ރިފްއަތުގެ އިތުރުން ފޮރިން މިނިސްޓަރު އަބްދުﷲ ޝާހިދު މަޤާމުން ވަކިކުރުމުގެ މަސައްކަތް މަޖިލީހުގެ އިދިކޮޅު ޕާޓީތަކުން ދަނީ ކުރަމުންނެވެ.
ފުރަތަމަ ދައުރަށް ހުށަހެޅުނު ބިލުތަކުގެ ތެރެއިން ނިންމައިލެވިފައިވަނީ އެންމެ ދެ ބިލުގެ މަސައްކަތެވެ. ފަސް ބިލެއް ތަޅުމުގައި އޮތްއިރު، 24 ބިލެއް އޮތީ ކޮމިޓީގައެވެ.
