ވަޒީރުގެ ވޯޓުގެ ސަބަބުން ރައީސް ޞާލިޙާއި ރައީސް ނަޝީދުގެ ގުޅުން އިތުރަށް ވާނީ ވަރުގަދަ!
- ރައީސް ނަޝީދު އެކުރައްވާ ކަމަކީ މި ސަރުކާރުގައި ބުރޯއެއް ފާލަން ދުއްވާލުންކަމަށެެވެ. އަދި އެކަމުގެ ސަބަބުން ދެ ރައީސުންގެ ގުޅުން ބަދަހިވެ، ވައުދުތަކާއި އެކު ކުރިޔަޘް ދިޔުމަށް އޮތް ހުރަސް ނައްތާލާ ރައްޔިތުންނަށް ހެޔޮ ވެރިކަމެއް ކޮށްދިނުންކަމަށެވެ. ބުރޯ އިންގެ ބިރު އަބަދުވެސް އޮތީ ދިވެހި ވެރިކަމުގެ އެތެރެއަށް ވަދެފައިކަމަށާއި، އެ ބިރު އެއްކޮށް ނެތެން ޖެހޭކަމަށް ރައީސް ނަޝީދު އަބަދުވެސް ވިދާޅުވާކަމަށް އެ މެންބަރު ވިދާޅުވިއެވެ.
މިވަގުތު ރާއްޖޭގެ ސިޔާސީ މަޝްރަހުގައި "ފަތުއަޑު" ކިޔާފާއި ހިނގަމުންދާ އެއް ވާހަކައަކީ މިނިސްޓަރ ފައްޔާޒުގެ އިތުބާރު ނެތްކަމަށް ސޮއި ހޯދުމަށް އެމްޑީޕީގެ މަޖިލިސް މެންބަރުންގެ ތެރޭގައި ކުރަމުންދާ މަސައްކަތުގެ ވާހަކައެވެ. އެގޮތުން ފައްޔާޒުގެ އިތުބާރު ނެތްކަމުގެ މައްސަލަ ވެއްދުމަށް އެންމެ އިސްކޮށް އުޅުއްވަނީ އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ކަމަށް ވެސް ދަނީ އަޑު ފެތުރެމުންނެވެ.
ފާއިތުވި ހަފުތާގެ ތެރޭގައި އެމްޑީޕީގެ ޤައުމީ މަޖިލީހުގެ "ވަޓްސްއަޕް" ގުރޫޕުގައި ރައީސް ނަޝީދު ވަނީ ފައްޔާޒަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން އެމްޑީޕީގެ ތެރޭގައި "ބްރޯ" ހެދިފައި ނޫޅެވެނޭކަމަށް ފައްޔާޒަށް ރައީސް ނަޝީދު ވަނީ އަންގަވާފައެވެ.
އަދި އެލެކްސް އަޙްމަދުގެ ނަމުގައި ޓްވިޓަރގައި އުޅުއްވަނީ ރައީސް ނަޝީދުކަމަށް އެ ދުވަހު އެ އައިޑީއިން ވަނީ އިއުލާނުކޮށްފައެވެ. އެއީ ރައީސް ނަޝީދުގެ ނުރަސްމީ އައީޑީކަމަށް އިއުލާނުކުރައްވަމުން، ވިދާޅުވެފައިވަނީ، ރައީސް މައުމޫނާއި އިލިޔާސްގެ އެތައް ކަމެއް ކަމެއް ފެނި އަދި ރައީސް ޔާމީނާއި އަދީބުގެ އެތައްކަމެއް ފެނިފައިވާތީ އެފަދަ ކަމެއް ސަރުކާރުގެ ތެރޭގައި ފެށެން އުޅޭފަދަ މޭރުމަކުން ވަނީ ޓްވީޓު ކުރައްވާފައެވެ.
ރައީސް ނަޝީދު އެ ވިދާޅުވާ ކަންބޮޑުވުންތައް!
ރާއްޖޭގެ ސިޔާސީ ހަޔާތް ހެކިދޭ އެއްކަމަކީ އަބަދުވެސް ކޮއިލު ތެރެއިން ވެރިކަމާއި ތޮޅެން މަސައްކަތް ކުރުމެވެ. ދެވަނަ ޖުމުހޫރިއްޔާގައި ހިނގާ ދިޔަ މައްސުނި ސިޔާސީ ވާދައަކީ އެއީއެވެ. މިހާރު މިއޮތީ މިފަހުން ފެންނަން އޮތް ޒަމާނީ "ޕޮލިޓިކްސް" އެވެ. ޖުމްހޫރީ ވެރިކަމުގެ ބައްޓަމާއި، ވައްޓަފާޅިއާ އޭގެ ހޭޑި ފޭޑި ދިވެހިން ދުއްގޮތަށް ބަލާލާއިރު ފެންނާން އޮތް ހަގީގަތަކީ މިއެވެ.
ރައީސް އިބްރާޙިމް ނާސިރު ވެރިކަން ހިންގެވީ އެކަނި މުޙައްމަދުގެ ހޮޓާ ހިންގެވި ގޮތަށެވެ. ސޭޓަކީވެސް ކައްކާއަކީ ވެސް ވެއިޓަރަކީ ވެސް އަދި ކިއެއްތަ ބާޒާރުކުރާނީ ވެސް މުޙައްމަދެވެ. މާބޮޑަށް ފާހަގަ ކުރެވޭ ގާތް އާއިލީ ލެެއެއް، ޅިޔަން ފަހަރި ގުޅުމެއް ރައީސް ނާސިރާއި މާ ގާތުގައިވި ކަމަކަށް ނުބުނެވޭނެއެވެ.
އައިހާ ބުރާސްފައްޗަކާ ވެރިކަމާއި ދެކޮޅަށް ހެލުވިހާ ހެލުވުމެއް ހެލުވީ ބޮޑުންނެވެ. އެގޮތުގައި ގޮސް އެވެރިކަން ނިމި ރައީސް މައުމޫނުގެ 30 އަހަރުގެ ވެރިކަން ފެށުނީ 1978 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހުގައެވެ.
ހުރިހާ ވެރިކަމަކާއި ބާރެއް އޮތަސް ރައީސް ނާސިރުގެ ވެރިކަމުގައި މާ ބޮޑަށް ފާހަގަނުވި އާކަމެއް މައުމޫނުގެ ވެރިކަމުން ފެންނަން ފެށިއެވެ. އާއިލީ ގުޅުމާއި، ޅިޔަން ފަހަރި ކަމުގެ މުގޫތަކާއި ލާ ވެރިކަން ގަދަކުރެއްވުމެވެ.
ކޮއްކޯފުޅު އަބްދުﷲ ޙަމީދުގެ ބައި ތަފާތެވެ. އެއީ އެއް މުގުލެވެ. މާ ބާރުގަދަ ޅިޔަނު އިލިޔާސް އިބްރާޙިމްގެ ދައުރު އަދި މާ ފުޅަލެވެ. އަރާ ނާރާ މަގާމުތަކާ ފައިސާއާއި ނުފޫޒުގެ ބާރު ދެކަންކައްޓަށް ވާންކޮށް މުގޫ ކޮށްލެވުނެވެ.
އެއް މޫސުމުގައި ޢަބްދުﷲ ހަމީދުގެ ފަޅިއަށް ވާންގަދަ ވާއިރު އިލިޔާސްގެ ކަންކައްޓަށް ދޫ ޖެހިލައެވެ. އަނެއް މޫސުމުގައި އޭގެ އިދިކޮޅެވެ. ކޮންމެ ކޮޅަކުން ވާން ކުރިޔަސް އުޅަނދު އޮތީ ހިފެހެއްޓިފައެވެ.
ނަމަވެސް އެއީ ހީވި ކުށް ހީއެކެވެ. ޅިޔަނަކަސް ފަހަރިއަކަސް އާއިލީ ލެޔަސް އަދި ބްރޯއެއް ހުރިއްޔާ އެ "ބުރަ" އުފުލަންޖެހެއެވެ.
އިލިޔާސް އިބްރާޙިމް ވެރިކަމަށް ވަޑައިގަތުމަށް ފިޔަވަޅު އަޅުއްވަން ފެއްޓެވި ހިސާބުން ވާން ވީ ހުރިހާ ގޮތެއް ވެ ލާން ޖެހުނު ގޮޅިއަށް ލެވި އެކަން ނިމިގެން ދިޔައީއެވެ.
އިލިޔާސް އަކީ "ރަން ތިރީސް" އަހަރުގެ ބުރޯއެވެ. އެތައް ބަޔަކަށް މާ ކަމުދިޔަ ބޭފުޅެކެވެ. އާޚިރުގައި އޮތީ ހަމަ އެންމެ ބިރެކެވެ. "ވެރިކަމެވެ".
އޭގެ ފަހުން 2008ގައި ފެށުނީ ރައީސް ނަޝީދުގެ ވެރިކަމެވެ. ގިނަ ޕާޓި އެކުލެވޭ ސިޔާސީ ނިޒާމުގެ ފެށުމެވެ. ވެރިކަން ހިންގެވީ "ބުރޯ" އަކާނުލައެވެ. މާ ބިޔަ ބަރުބޮޑު ބާރުގަދަ ވަޒީރަކު ނެތެވެ. އެންމެ އަރިސް މަޝްވަރާވެރި އަރިސް ބޭފުޅަކީ އަދުގެ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިހެވެ. އެއީ ވެރިކަމާއި ގުޅުމެއް އޮތް ބޭފުޅެއް ނޫނެވެ. ސީނިއަރ މަޖިލިސް މެންބަރެކެވެ. އެހެނަސް ޅިޔަން ފަހަރިކަމުގެ ގުޅުން އޮތެވެ. އަދި ރަހުމަތްތެރިކަން މާ ބޮޑަށެވެ.
އެ ތިން އަހަރުގައި ވެރިކަމަށް ލެއްގީ އެމްޑީޕީގެ މެންބަރުން ތުހުމަތު ކުރާ ގޮތުންނަމަ "ބާޣީ"އެކެވެ. އެއީ ބުރޯއެއް ނެތުމުން ވީކަމެއް ކަމަށް ވެދާނެތާއެވެ.
އޭގެފަހުން ރައީސުލްޖުމްހޫރިއްޔާ ކަމުގެ މަގާމަށް ރައީސް ޢަބްދުﷲ ޔާމީން ޢަބްދުލްޤައްޔޫމް ވަޑައިގެންނެވީ، "އޮރިޖިނަލް ބުރޯ" އަކާ އެކުގައެވެ. ފިސާރި މޮޅުވާނެ ކަމަށް ވިސްނަވައިގެން ކަމަށްވެސް ވެދާނެއެވެ. އަމުދުން އެ "ބުރޯ" އަކީ ކުރިން ނުވެސް ދަންނަ އަދި އާއިލީ ގާތް ގުޅުމެއް ނެތް ޢިލްމީ ބުރޯ އެކެވެ.
ރައީސް ޔާމީންގެ ވެރިކަމުގައި ޖެހުނު އެންމެ ބޮޑު ސިއްކަ އަކީވެސް އަދި އަދިރިގަނޑަކީ ވެސް ހަމަ އެ ބުރޯއެވެ. ކޮރަޕްޝަނާއި ފަސާދަ އިންތިހާއަށް އެދުވަސް ވަރު ދިޔަ ކަމުގެ ތުހުމަތުތައް ހެސްކިޔާފަ ބޮޑެވެ. އަދި ރައީސް ޔާމީނަށް ވުރެ އުހުގައި ބުރޯ އުދުހެމުން ދިޔަ މަންޒަރު ރާއްޖޭގެ ސިޔާސީ މަޝްރަހު ބަލާލީމަ އޭރުގައި ފެންނާނެކަން ޔަޤީނެވެ. އެންމެ ފަހުން އަމިއްލަ ފުރާނަފުޅަށް ނުރައްކާވާ ހިސާބަށް ބުރޯގެ އަމަލުތައް ދިޔަކަމަށް ނިންމަވައި އެ "ބުރޯ" ވެސް ގޮޅިއަށް ފެތުނީއެވެ.
އެ ވެރިކަން ނިންމާލާ އެމްޑީޕީއަށް އަލުން ވެރިކަން ލިބުނީ ބޮޑު އިއްތިހާދެއްގެ ތެރެއިންނެވެ. މިވެރިކަމުގައިވެސް ބުރޯއެއް ފެންމަތިވެއްޖެ ކަމުގެ އިހުސާސް އެމްޑިޕީގެ ރައީސަށް ކުރެވިއްޖެއެވެ. ރައީސް އަރިހަށް ޝަކުވާ ހިފައިގެން މަޖިލިސް މެންބަރުން ދުވަސް ފަށައިފިއެވެ.
ފައްޔާޒު އާ ދެކޮޅަށް ހުރި މައްސަލަތަކަކީ ކޮބާ؟
މިނިސްޓަރ ފައްޔާޒަކީ ކިޔަވައިގެން ހުންނެވި ޒުވާން ބޭފުޅެކެވެ. މި ސަރުކާރުގެ އެންމެ ނުފޫޒު ގަދަ ވަޒީރަކީ ފައްޔާޒުކަމަށް ސިޔާސީ ގިނަ ބޭފުޅުން ތުހުމަތު ކުރައްވައެވެ. މިކަމާއި ގުޅިގެން ނަން ނުޖެހުމަށް ޝަރުތުކޮށް އެމްޑީޕީގެ ޕީޖީ ގްރޫޕްގެ މެންބަރަކު ވިދާޅުވީ، ފައްޔާޒު އުޅުއްވަނީ "ބްރޯ" ހެއްދެވިގެން ކަމަށެވެ. އެގޮތުން މަޖިލިސް މެންބަރެއް ވިޔަސް ޤައުމީ މަޖިލީހުގެ މެންބަރެއް ވިޔަސް ފައްޔާޒަށް ގުޅުއްވައި "އާދޭސް" ދަންނަވައިގެން ނޫން ގޮތަކަށް މި ސަރުކާރުގެ ތެރެއިން ކަމެއް ނުވާކަމަށެވެ. މި މައްސަލަތައް ރައީސް ނަޝީދަށް ތަކުރާރުކޮށް ޕާޓީގެ މެންބަރުން ހުށަހަޅަމުން ދާތާ ވަރަށް ދުވަސްވެއްޖެ ކަމަށް ވެސް އޭނާ ވިދާޅުވިއެވެ.
އަދި ސަރުކާރުގެ ޕްރޮޖެކްޓްތައް އެވާރޑް ކުރުމާއި، ބަދަލު ދިނުމުގެ އާ ސަގާފަތެއް ސަރުކާރުގެ ތެރޭގައި އަށަގަނެ، އެކަންކަން ކުރުމުގައިވެސް ގޮތް ނިންމަވާ ބޭފުޅަކަށް މިނިސްޓަރ ފައްޔާޒު ވެގެން ގޮސްފައިވާ ކަމަށް ވެސް އެ މެންބަރު ވިދާޅުވިއެވެ. ކޮރަޕްޝަނާއި ފަސާދަ އިންތިހާއަށް ސަރުކާރުގެ ތެރޭގައި އަށަގެންފައިވާއިރު، "ބްރޯ" ބޭނުންވާ ކަމެއް ބޭނުންގޮތަކަށް ނިންމަމުން ދާކަމުގެ އެތައް ޝަކުވާއެއް ޕާޓީގެ ރައީސަށް ހުށަހަޅާފައިވާ ކަމަށް ވެސް ވިދާޅުވިއެވެ.
އިތުބާރު ނެތްކަމަށް ސޮއިކުރަން ފެށުން
ކަންބޮޑުވުންތައް އިންތިހާއަށް ދިޔުމުން ރައީސް ނަޝީދު އިސްވެ ހުންނަވައިގެން މިނިސްޓަރު ފައްޔާޒު އިސްމާޢިލްގެ އިތުބާރު ނެތްކަމުގެ ސޮއި ހޯދަން ފެއްޓެވީކަމަށް ނަން ހާމަނުކުރުމަށް ޝަރުތުކޮށް މައުލޫމާތު ދެއްވި މަޖިލިސް މެންބަރު ވިދާޅުވިއެވެ. އަދި މިހާތަނަށް އައިއިރު 32 މެންބަރުންގެ ސޮއި ހޯދާފައިވާކަމަށް ވެސް އެ މެންބަރު ވިދާޅުވިއެވެ.
ސޮއިކުރާ މެންބަރުން ވޯޓު ނުދެއްވާނެ ކަމަށާއި، ރައީސް ޞާލިހު ފައްޔާޒު ދިފާއު ކުރައްވާނެ ކަމަށް ދެކެވޭ ވާހަކަ
ރައްޔިތުންގެ މަޖިލީހުގައި އެމްޑީޕީގެ 65 މެންބަރުން ތިއްބަވާއިރު، އެއީ ސުޕަރ މެޖޯރިޓީއެވެ. މަޖިލީހުގެ ސުޕަރ މެޖޯރިޓީން އެ ޕާޓީގެ މެންބަރަކު ވަޒީރުކަމުން ވަކިކުރަން ސޮއިކުރަން މިވަނީ ފަށާފައެވެ. ގިނަ މެންބަރުން ސޮއި ކުރައްވަނީ ސީދާ ރައީސް ނަޝީދުގެ ކުރިމަތީގައި "ނޯ" ވިދާޅުވާން ނުކެރިގެން ކަމަށާއި ބައެއް މެންބަރުން ސޮއި ކުރެއްވި ނަމަވެސް ފައްޔާޒުއާއި ދެކޮޅަށް ވޯޓު ނުދެއްވާނެކަމުގެ އަޑުތައް ދަނީ ފެތުރެމުންނެވެ. އަދި ރައީސް ޞާލިހު ހުންނެވީ ފައްޔާޒުގެ ދިފާއުގައި ކަމަށް ވެސް ދަނީ އަޑުތައް ފެތުރެމުންނެވެ.
މިކަމާއި ގުޅިގެން އެމްޑީޕީގެ މަޖިލިސް މެންބަރަކު ވިދާޅުވީ، ސޮއި ކުރައްވާ ބޭފުޅުންނާއި އަދި އިތުރު މެންބަރުންވެސް މި ވޯޓުގައި ބައިވެރިވާނެ ކަމުގެ ޔަޤީންކަން ދެއްވާފައިވާ ކަމަށެވެ. އަދި ރައީސް ޞާލިހަކީ ސިޔާސީ ހަރުދަނާ ބޭފުޅެއް ކަމަށާއި، މި ކުރިޔަށް ދަނީ ގާނޫނު ހަދާ މަޖިލީހަށް އޮންނަ ބާރެއްކަމުން ރައީސް ޞާލިހު މިކަމުގެ ތެރެއަށް ވަދެވަޑައި ނުގަންނަވާނެކަމުގެ ޔަޤީންކަން ލިބިފައިވާކަމަށެވެ. އަދި މި ދަނޑިވަޅުގައި ރައީސް ޞާލިހުގެ ފަރާތުން ކަމަށް ބުނެ، ފޯން ކޯލްތައް ކުރައްވަމުން ގެންދަވާ ކަމަށާއި، ނަމަވެސް އެއީ ރައީސް ޞާލިހު ކުރައްވަމުން ދާކަމެއް ނޫންކަމަށް ވެސް އެ މެންބަރު ވިދާޅުވިއެވެ.
ރައީސް ޞާލިޙާއި ރައީސް ނަޝީދުގެ ގުޅުން
ފައްޔާޒުގެ އިތުބާރު ނެތްކަމުގެ މައްސަލައާއެކު އެމްޑީޕީގެ ވައިބަރ އަދި ވަޓްސްއަޕް ގުރޫޕުން ފެށިގެން ގޮސް މީސް މީޑިއާގައި ދަނީ ބަހުސްތައް ކުރެވެމުންނެވެ. ދެ ފެކްޝަނެއް އެމްޑީޕީ ތެރޭގައި އެބައޮތްކަމަށް ވެސް ބައެއް ފަރާތްތަކުން ދަނީ ތުހުމަތު ކުރަމުންނެވެ.
"ދެން"އަށް މައުލޫމާތު ދެއްވަމުން ރައްޔިތުންގެ މަޖިލީހުގެ މެންބަރެއް ވިދާޅުވީ، ދެ ރައީސުންގެ މެދުގައި އޮންނަނީ ވަރަށް ބަދަހި ގުޅުމެއްކަމަށެވެ. އެހެންކަމުން ފައްޔާޒުގެ ވޯޓު ކަންތައް ރައީސް ޞާލިހަށް ނާންގާ ރައީސް ނަޝީދު ނުކުރައްވާނެ ކަމަށާއި، ރައީސް ނަޝީދު އެކުރައްވާ ކަމަކީ މި ސަރުކާރުގައި ބުރޯއެއް ފާލަން ދުއްވާލުން ކަމަށެެވެ. އަދި އެކަމުގެ ސަބަބުން ދެ ރައީސުންގެ ގުޅުން ބަދަހިވެ، ވައުދުތަކާއި އެކު ކުރިޔަށް ދިޔުމަށް އޮތް ހުރަސް ނައްތާލާ ރައްޔިތުންނަށް ހެޔޮ ވެރިކަމެއް ކޮށްދިނުން ކަމަށެވެ. ބުރޯ އިންގެ ބިރު އަބަދުވެސް އޮތީ ދިވެހި ވެރިކަމުގެ އެތެރެއަށް ވަދެފައި ކަމަށާއި، އެ ބިރު އެއްކޮށް ނެތެން ޖެހޭކަމަށް ރައީސް ނަޝީދު އަބަދުވެސް ވިދާޅުވާކަމަށް އެ މެންބަރު ވިދާޅުވިއެވެ.
