ހުރިހައި ވަޢުދެއް ފުއްދާ ކަމަށް ބުނާތީ، ވޭމަންޑޫގެ ރައްޔިތުން ތިބީ ކަންބޮޑުވެފައި: ރިޔާޒު
މި ސަރުކާރުން ރައްޔިތުންނަށް ވެފައިވާ ހުރިހައި ވަޢުދުތަކެއް ފުއްދަމުން އަންނަ ކަމަށް ބުނާތީ، ތ.ވޭމަންޑޫގެ ރައްޔިތުން ތިބީ ކަންބޮޑުވެފައިވާ ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު ރިޔާޒު ވިދާޅުވެއްޖެއެވެ.
ިރިޔާޒު މިފަދައިން ވިދާޅުވެފައިވަނީ، ރައްޔިތުންގެ މަޖިލީހުގެ މިއަދުގެ ޖަލްސާގައި، އެޑިއުކޭޝަން މިނިސްޓަރު، ޑރ. ޢާއިޝަތު ޢަލީއާ ސުވާލު ކުރައްވަވައި، ވޭމަންޑޫގައި ހިންގަން އުޅުނު ދެ މަޝްރޫޢުއެއް ނުނިމޭކަން ފާހަގަކުރައްވަމުންނެވެ.
އެގޮތުން ރިޔާޒު ފާހަގަކުރެއްވީ، އެ ރަށުގެ ތިން ފަންގިފިލާގެ ސްކޫލް އިމާރާތާއި، މަލްޓިޕާޕަސް ހޯލުގެ މަސައްކަތް ވެސް ކުރިއަށް ނުދާ ކަމެވެ.
"މި ސަރުކާރުން ވެފައިވާ ހުރިހައި ވަޢުދެއް ފުއްދާ ކަމަށް ވިދާޅުވެފައިވާތީވެ، ވޭމަންޑޫގެ ރައްޔިތުން ތިބީ ވަރަށް ކަންބޮޑުވެފައި." ރިޔާޒު ވިދާޅުވިއެވެ.
ރިޔާޒުގެ ވާހަކައާ ގުޅިގެން މިނިސްޓަރު ވިދާޅުވީ، ވޭމަންޑޫ ސްކޫލް އިމާރާތުގެ މަސައްކަތް ޓެންޑަރ ބޯޑުގައިވާއިރު، އެ މަޝްރޫޢުގެ ޢަމަލީ މަސައްކަތް ފެށޭނެ، ސީދާ ތާރީޚެއް ދަންނަވަން ނޭނގޭ ކަމަށެވެ.
މިނިސްޓަރު ވިދާޅުވީ، ވޭމަންޑޫ ސްކޫލްގެ މަލްޓި ޕާޕަސް ހޯލު އެޅުމުގެ މަސައްކަތްވެސް ކުރިއަށް ނުދާ ކަމަށާއި، އެ މަޝްރޫއުގެ އެއްބަސްވުންވެސް އުވައިލައި، އެހެން ބަޔަކާ ޙަވާލު ކުރުމުގެ މަސައްކަތް ދަނީ ކުރިއަށް ކަމަށެވެ.
Ads by STO
