ހާލުގައި ޖެހުނު ދެ އަވަށެއްގެ މީހުން ތިން އަހަރު ވަންދެން ބަލަން ޖެކަލިން ހަވާލުވެއްޖެ
ކޮވިޑްގެ ހާލަތާއި ގުޅިގެން އިންޑިއާގެ ގިނަ ބަޔަކު ވަނީ ވަރަށް ހާލުގައި ޖެހިފައެވެ. ޚާއްސަކޮށް އިންޑިއާގެ ފަގީރު އަވަށްތަކުގައި ދިރިއުޅޭ މީހުންގެ ހާލު އިތުރަށް މިދުވަސްވަރު ވަނީ ދަށްވެފައެވެ. އަދި އެމީހުންނަށް އެހެން މީހުންގެ އެހީތެރިކަމަށް ވަނީ އިންތިހާއަށް ބޭނުން ޖެހިފައެވެ.
މިފަދަ ދަނޑިވަޅެއްގައި ހާލުގައި ޖެހިފައިވާ މީހުންނަށް ދީލަތިކަމުގެ އެހީތެރިކަމެއް ފޯރުކޮށްދީފައިވާ އެކަކީ ބޮލީވުޑްގެ އެކްޓްރެސް ޖެކަލިން ފާނަންޑޭސް އެވެ.
އިންޑިއާގެ ރިޕޯޓުތަކުން ބުނެފައިވާ ގޮތުގައި ޖެކަލިން ވަނީ ފަގީރު ދެ އަވަށެއްގެ މީހުން ތިން އަހަރު ދުވަސް ވަންދެން ބެލުމާއި ހަވާލުވެފައެވެ. އެގޮތުން މުޅި ޖުމްލަ 1،550 މީހުންގެ ކެއިން ބުއިމާއި އެހެނިހެން ޚަރަދުތައް ޖެކަލިން އެމުއްދަތުގައި ބަލަހައްޓާނެއެވެ.
އޭނާގެ އުފަންދުވަހު ޖެކަލިން ބުނެފައިވަނީ މަހަރާޝްތުރާގެ ޕަތަރްދީ އަވަށާއި ސަކޫރް އަވަށުގެ މީހުންގެ ޚަރަދުތައް ތިން އަހަރު ވަންދެން އޭނާ ބަލަހައްޓާނެ ކަމަށެވެ.
"މިކަން ކުރަން އަހަރެން ވިސްނާތާ މިހާރު ދުވަސްކޮޅެއް ވެއްޖެ. ޕެންޑެމިކްގެ މިދުވަސްކޮޅާއި ގުޅިގެން މިއަހަރު ވެފައިމިވަނީ އަހަރުމެން އެންމެންނަށް ވެސް ވަރަށް އުނދަގޫ އަހަރަކަށް. އަހަރުމެންގެ ތެރެއިން ބައެއް މީހުންގެ ނަސީބު ރަނގަޅު ކަމުގައިވިޔަސް މިފަދަ ދުވަސް ވަރެއްގައި ވަރަށް ހާލުގައި ޖެހިފައިވާ މީހުން ވެސް އެބަތިބި" ޖެކަލިން ބުނެފައިވެއެވެ.
އެއަވަށްތަކުގެ މީހުންނަށް އެހީތެރިވުމުގެ ގޮތުން، އެމީހުންނަށް ތަރުކާރީއާއި އެނޫންވެސް ތަކެތި ލިބޭނެފަދަ ގަސްތައް އެއަވަށްތަކުގައި އިންދުމާއި، ކެއިންބުއިން ފޯރު ކޮށްދިނުމުގެ އިތުރުން އަލަށް އުފަންވާ ކުދިންގެ ކަންކަން ބެލެހެއްޓުން ވެސް ހިމެނޭކަމަށް ޖެކަލިން ބުންޏެވެ.
"މުޖުތަމައުއަށް ފައިދާހުރި މަސައްކަތެއް ކޮށްދިނުމަށް އަހަރެންގެ މައިންބަފައިން އަބަދުވެސް އަހަންނަށް ދަސްކޮށްދީފައިވޭ. އަހަރެންގެ މިިނިންމުމަށް ވެސް އެންމެ ބޮޑަށް ހިތްވަރު ދީފައިވަނީ އަހަރެންގެ މައިންބަފައިން" ޓައިމްސް އޮފް އިންޑިއާއަށް މައުލޫމާތު ދެމުން ޖެކަލިން ބުނެފައިވެއެވެ.
