މީހުން މަދުވެގެން ޖަލްސާ ލަސްކުރި ވާހަކަ ޖޭޕީން ދޮގުކޮށްފި
މިދިޔަ ހުކުރު ދުވަހުގެ ރޭ ޖުމްހޫރީ ޕާޓީގެ ރިޔާސީ ޓިކެޓް ދިނުމަށް ބޭއްވި ޖަލްސާ, މީހުން މަދުވެގެން ލަސްކުރި ވާހަކަ އެ ޕާޓީން ދޮގުކޮށްފިއެވެ.
ޖޭޕީގެ ރިޔާސީ ކެނޑިޑޭޓް ޤާސިމް އިބްރާހީމްގެ އެޑްވައިޒަރު, ވިލުފުށީ ދާއިރާގެ ކުރީގެ މެންބަރު ރިޔާޒް ރަޝީދު މިއަދު ކުރި ޓްވީޓެއްގައި ވިދާޅުވީ, ޖަލްސާ ފަށާފައިވަނީ ކުރިން ވެސް ރާވާފައި އޮތް ވަގުތުގައި ކަމަށެވެ.
އެގޮތުން ޖަލްސާގެ ބައިވެރިންނަށް 8 ޖަހާއިރު އައުމަށް ދައުވަތު ދިން ކަމަށާއި, ޕާޓީގެ ކައުންސިލް މެންބަރުންނަށް 9:15އަށް ދައުވަތު ދެވުނު ކަމަށާއި ޕާޓީގެ ލީޑަރަށް ދައުވަތު ދެވުނީ 9:40ގައި ކަމަށް ރިޔާޒް ރަޝީދު ވިދާޅުވިއެވެ. އަދި ޖަލްސާ ފަށަން ކުރިން ވެސް ކަނޑައެޅި ގަޑިއަކީ 9:45ކަމަށް ރިޔާޒް ވިދާޅުވިއެވެ. ރިޔާޒް ވިދާޅުވީ, ޖަލްސާ ފެށުމުގެ ކުރިން އޮތީ ހަބޭސް ބޮޑުބެރުގެ ހުށަހެޅުންތަކެއް ކަމަށެވެ.
ޖޭޕީން ބުނަމުންދަނީ އެ ޕާޓީން ބާއްވާފައިވަނީ ބޮޑު ޖަލްސާއެއް ކަމަށެވެ. އަދި އިދިކޮޅުން ހުސްގޮނޑީގެ ފޮޓޯ ނަގައިގެން މީސްމީޑިއާގައި އާއްމުކުރަމުންދާ ކަމަށް ވިދާޅުވިއެވެ.
