ޖަލްސާ ކުރިއަކަށް ނުގެންދެވުނު، އެމްޑީޕީން އަޑުގަދަ ކުރާތީ ނިންމައިލައިފި
ރައްޔިތުންގެ މަޖިލީހުގެ ޖަލްސާގައި އެމްޑީޕީއަށް ނިސްބަތްވާ މެމްބަރުން އަޑުގަދަ ކުރާތީ ޖަލްސާ ކުރިއަށް ނުގެންދެވި ނިންމައިލައިފިއެވެ.
ރައްޔިތުންގެ މަޖިލީހުގެ ރައީސް މުޙައްމަދު ނަޝީދާއި ނައިބު ރައީސް އީވާ އަބްދުﷲގެ އިތުބާރު ނެތްކަމުގެ މައްސަލައެއް ހުށަހެޅިފައި އޮތުމުން މިއަދުގެ ޖަލްސާގެ ރިޔާސަތު ބެލެހެއްޓެވީ ވިލުފުށި ދާއިރާގެ މެމްބަރު ޙަސަން އަފީފެވެ. އިތުބާރު ނެތްކަމުގެ އެއްވެސް މައްސަލައެއް އެޖެންޑާ ނުކޮށް މިއަދު ކުރިއަށް ގެންދަން ނިންމާފައި އޮތީ ޓްރާންސްޕޯޓު މިނިސްޓަރު އައިޝަތު ނަހުލާއާއި ސުވާލު ކުރުމެވެ.
އެމްޑީޕީ މެމްބަރުން ވަނީ ޖަލްސާ ފެށުމާއިއެކު ނިޒާމީ ނުކުތާ ނަންގަވައި މަޖިލިސް ކުރިއަށް ގެންދަނީ ޤަވާއިދާއި ހިލާފަށްކަމަށް ވިދާޅުވެ އަޑުގަދަ ކުރަން ފަށައިފައެވެ. އަދި ރައީސާއި ނައިބު ރައީސްގެ އިތުބާރު ނެތްކަމުގެ މައްސަލައެއް ހުށަހެޅިފައި އޮއްވައި އެހެން ކަމެއް އެޖެންޑާ ނުކުރެވޭނެކަމަށްވެސް އެމްޑީޕީ މެމްބަރުން ބުނަމުން ގެންދިޔައެވެ.
އެކި ނަންނަމުން އަފީފާއި މުހާތަބުކޮށް މަޖިލީހުގައި އަޑުގަދަ ކުރާތީ ރިޔާސަތުން ވަނީ ފަސް މިނެޓަށް ޖަލްސާ މެދުކަނޑައިލައިފައެވެ. އެއަށްފަހު އަނެއްކާވެސް ޖަލްސާ ފެށިއެވެ. ދެން ފުރުސަތު ދިނީ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ކުއްލި މައްސަލައެއް ހުށަހަޅުއްވަން އެދިވަޑައިގެންފައި އޮތުމުން އެކަމަށެވެ.
ސަރުކާރުގެ ކުންފުނިތަކަށް ދޫކުރާ ފައިސާގެ ތަފްސީލު ހޯދަން ކުއްލި މައްސަލައެއް ހުށަހަޅަނިކޮށް އާދަމް ޝަރީފުގެ މައިކު އަތުލައި އެމްޑީޕީ މެމްބަރުން ވަނީ އަޑުގަދަކުރަން ފަށައިފައެވެ. އެހެންވެ ރިޔާސަތުން ވަނީ އެގޮތަށް ޖަލްސާ ކުރިއަށް ނުގެންދެވޭނެކަމަށް ވިދާޅުވެ މެދުކަނޑައިލައިފައެވެ.
މަޖިލިސް ޖަލްސާ ކުރިއަށް ނުގެންދެވުނުއިރު ކޮމިޓީތައްވެސް އޮތީ ހުއްޓިފައެވެ. އެމްޑީޕީގެ 13 މެމްބަރަކު އެޕާޓީން ވަކިވުމާއިއެކު ކޮމިޓީތައް އެކުލެވޭ ގޮތަށް ބަދަލުތަކެއް ގެންނަން ޖެހިފައި އޮތުމުން އެކަންވެސް އޮތީ ނުކުރެވިއެވެ.
މަޖިލީހުގެ އިދާރާއިން ބުނެފައިވަނީ ކޮމިޓީތައް އެކުލަވައިލުން ހުއްޓިފައި އޮތީ އެމްޑީޕީގެ ޕީޖީ ލީޑަރު މުހައްމަދު އަސްލަމް މަޑުކުރަން އެންގުމުން ކަމަށެވެ. މިއަދުގެ ޖަލްސާއަށް އިތުބާރު ނެތްކަމުގެ މައްސަލަ އެޖެންޑާކޮށްފައި ނުވަނީ އާންމު ކޮމިޓީން ބަހުސްގެ ވަގުތު ކަނޑައަޅާފައި ނުވާތީކަމަށް އިދާރާއިން ބުންޏެވެ. އާންމު ކޮމިޓީ އެކުލަވާލާފައި ނުވާތީ އެކޮމިޓީގެ ބައްދަލުވުމެއް ކުރިއަށް ގެންދެވޭކަން ނެތެވެ.
