ކޮމިޓީތައް ކުރިއަށް ނުދާނަމަ ކޮޓަރިތައް އަބަދުވެސް ހުންނާނީ ތަޅުލާފައި: މަޖިލިސް އިދާރާ
ރައްޔިތުންގެ މަޖިލީހުގެ ކޮމިޓީތައް ކުރިއަށް ގެންގޮސްދާނެތީ، ކޮޓަރިތައް ތަޅުލާފައި ހުރިކަމަށް ބުނެ ބައެއް މީޑިއާތަކުން ފަތުރާ މައުލޫމާތު ސައްހަ ނޫންކަމަށް މަޖިލިސް އިދާރާއިން ބުނެފިއެވެ.
"ރައްޔިތުންގެ މަޖިލީހުގެ ކޮމިޓީތައް ކުރިއަށްގެންދިޔުމަށް ކަނޑައަޅާފައިވާ ހުރިހާ ކޮޓަރިތަކެއް ތަޅުލައި ބަންދުކޮށްފި" ކަމަށް ބުނެ ބައެއް މީޑިއާތަކުން ވަނީ މިކަން މިގޮތަށް ކުރީ މަޖިލިސް އިދާރާއިން ކަމަށެވެ. އަދި އެއީ ކޮމިޓީތައް ކުރިއަށް ގެންދިޔުމަށް ހުރަސް އެޅުމުގެ ގޮތުން އެއިދާރާއިން ކުރި ކަމެއްކަމަށް ދޭހަވާ ފަދަ ގޮތަކަށް އެމީޑިއާތަކުން ވަނީ މައުލޫމާތު އާންމުކޮށްފައެވެ.
މިކަމާއި ގުޅިގެން މަޖިލިސް އިދާރާއިން ބުނީ ރައްޔިތުންގެ މަޖިލީހުގެ އިދާރާގައި ކޮމިޓީ ބައްދަލުވުން ބާއްވާ ކޮޓަރިތަކުގައި މުހިއްމު ލިޔެކިޔުންތައް ހުންނާތީ، ކޮޓަރިތަކުގައި މަސައްކަތެއް ކުރިއަށްނުދާ ހުރިހާ ވަގުތުތަކެއްގައިވެސް އެ ކޮޓަރިތަކަކީ ތަޅުލާފައި ހުންނަ ކޮޓަރިތަކެއް ކަމުގައެވެ.
މަޖިލީހުގެ މީޑިއާ އޮފިޝަލް ހަސަން ޒިޔާއު ވިދާޅުވީ މިއީ މަޖިލީހުގައި އާންމުކޮށްވެސް ކަން ކުރާ އުސޫލު ކަމަށެވެ.
ރައީސް އިބްރާހިމް މުހައްމަދު ޞާލިހު ކޮންޓްރޯލް ކުރައްވާ މަޖިލިސް މެމްބަރުން ތުހުމަތު ކުރައްވަނީ ރައީސް މުހައްމަދު ނަޝީދާއި މަޖިލިސް އިދާރާ ގުޅިގެން ޖަލްސާތައް ކުރިއަށް ގެންދިޔުމަށް ދަނީ ހުރަސް އަޅަމުންނެވެ. އަދި އެކަން ކުރަނީ މަޖިލީހުގެ ގަވާއިދާއި ގާނޫނު އަސާސީއާވެސް ހިލާފަށްކަމަށް ސަރުކާރު މެމްބަރުން ދަނީ ވިދާޅުވަމުންނެވެ.
އެމްޑީޕީގައި ތިއްބެވި 13 މެމްބަރަކު އެޕާޓީން ވަކިވުމާއި ގުޅިގެން ކޮމިޓީތައް އެލުލެވޭ ގޮތަށް ވަނީ ބަދަލު ގެންނަން ޖެހިފައެވެ.
އެހެންނަމަވެސް ސިޔާސީ ޕާޓީތަކުގެ މެދުގައި މިކަމާއި ގުޅޭގޮތުން އެއްބަސްވުމަކަށް ނާދެވި ކޮމިޓީތައް އޮތީ ހުއްޓިފައެވެ.
މައިނޯރިޓީގައި ތިއްބެވި ހުރިހާ ޕާޓީތަކުގެ މެމްބަރުން ގުޅިގެން ބޭއްވި ނޫސްވެރިންގެ ބައްދަލުވުމުގައި މިއަދު ވިދާޅުވީ އެމްޑީޕީން ހުށަހަޅަނީ ކޮންމެ ކޮމިޓީއެއްގައި 64 އިންސައްތަ އެޕާޓީއަށް ދިނުމަށް ކަމަށެވެ.
އެ އިންސައްތަ މިންކުރަނީ މަޖިލިސް ރައީސްވެސް ހިމަނުއްވައިގެން ކަމަށާއި އެ އިންސައްތަ ދިމާނުވާކަމަށް މައިނޯރިޓީން ބުންޏެވެ.
އަދި ކޮންމެ ކޮމިޓީއެއްގައި އެމްޑީޕީއިން އެދޭ އިންސައްތަ ދީގެން ކުރިއަށް ގެންދިޔުމަށް އެއްބަސްވެވެން ނެތްކަމަށްވެސް މައިނޯރިޓީން ބުންޏެވެ. މައިނޯރިޓީއިން ކޮމިޓީތައް އެކުލަވާލުމަށް ހުށަހަޅާފައިވާ އުސޫލުގެ ތެރެއިންވެސް އެމްޑީޕީއަށް 50 އިންސައްތައަށްވުރެއް މަތިން ޖާގަ ދެވޭކަމަށް މައިނޯރިޓީން ވަނީ ފާހަގަކޮށްފައެވެ.
މަޖިލީހުގެ ޖަލްސާ މިއަދުވެސް ކުރިއަށް ނުގެންދެވި ވަނީ ހުއްޓާލައިފައެވެ.
Ads by STO
