ވެރިކަން ކުރެއްވި އިރުއްސުރެއް ތަންތަނުގައި ތަޅު ނޭޅުވިގެން އުޅުއްވަނީ ނަޝީދު: އެމްޑީޕީ

2008 ވަނަ އަހަރު ވެރިކަމަށް ވަޑައިގެންވެސް އުޅުއްވީ ތަންތަނުގައި ތަޅު އަޅުވަން ކަމަށާއި މިހާރު ރައްޔިތުންގެ މަޖިލީހުގައިވެސް މަރުތަޅު އަޅުވައިގެން އުޅުއްވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުކަމަށް ރައްޔިތުންގެ މަޖިލިސް ތަމްސީލު ކުރައްވާ އެމްޑީޕީ މެމްބަރުން ވިދާޅުވެއްޖެ އެވެ.

Ads by STELCO

އެމްޑީޕީގެ މަޖިލިސް މެމްބަަރުން މިއަދު މެންދުރު ފަހު ބޭއްވި ނޫސްވެރިންގެ ބައްދަލުވުމެއްގައި ކިނބިދޫ ދާިއރާގެ މެމްބަރު މުހައްމަދު ނާޝިޒު ވިދާޅުވީ މަޖިލީހުގެ ކޮމިޓީތައް ހުއްޓިފައި އޮންނަތާ ތިން ހަފްތާ ވެފައިވާއިރު ކޮމިޓީތައް ކުރިއަށް ގެންދާނެ ވަގުތަކާއި ތަނެއް އަދި އެ ކުރިއަށް ގެންދާނެ ގޮތެއް އެނގިވަޑައިގަންނަވާނީ މަޖިލީހުގެ ގަވާއިދު ބުނާ ގޮތުން މުގައްރިރަށް ކަމަށެވެ. އަދި 17 ވަނަ ދައުރުގައި މަސައްކަތް ކޮށް، 18 ވަނަ ދައުރު ގާތުން ބަލައި އަދި 19 ވަނަ ދައުރުގައި މަސައްކަތް ކުރާއިރު މަޖިލީހުގެ ރައީސް ކޮމިޓީތަކުގެ ކޮންޓްރޯލް ނެންގެވިތަން ފެނިފައި ނުވާކަމަށް ނާޝިޒު ވިދާޅުވި އެވެ.

"އެހެންމަ މިހާ އަންޑިމޮކްރެޓިކްކޮށް ކަންކަން ކުރައްވައި، އަމިއްލަފުޅަށް އެބަ ވިދާޅުވޭ ތިމަންނާއަކީ ޑިމޮކްރަސީގެ ބައްޕައޭ. އަޅުގަނޑު ހިތަށް އަރާ މީ ކޮންކަހަލަ ބަފައެއް ބާއޭ" ނާޝިޒު ވިދާޅުވި އެވެ.

ހަވާސާއިން ބޭރުން ވާހަކަ ދައްކަވަމުން ނާޝިޒު ވިދާޅުވީ ތިން ބާރު އެކުވެގެން ދައުލަތެއް އުފެދޭއިރު ރައީސް ނަޝީދު ވެރިކަމަށް ވަޑައިގެން ދައުލަތުގެ ތިންވަނަ ބާރުކަމުގަވާ ސުޕްރީމް ކޯޓުގައި ތަޅު އެޅުވިކަން ފާހަގަކޮށްލަން ބޭނުންވާ ކަމަށެވެ. އަދި އޭގެ ފަހުން މަޖިލީހުން ސަރުކާރު ހިންގަން ހުރަސް އަޅާކަމަށް ވިދާޅުވެ ހުރިހާ ވަޒީރުން ލައްވައި އިސްތިއުފާ ދެއްވިކަމަށްވެސް އޭނާ ވިދާޅުވި އެވެ.

"މުޅި ސަރުކާރުގަ އެވިދާޅުވާ ޑެޑްލޮކެއް އަޅުވައިގެން މުޅި ސަރުކާރު ހުއްޓުމަކަށް ގެންނަވައިގެން ހުންނެވީ. ދެން މިއަދު އަޅުގަނޑުމެންނަށް މިއިވެނީ ރައްޔިތުންގެ މަޖިލީހުގެ ކޮޓަރިތަކުގެ ދޮރޮތައްވެސް ތަޅުލައިގެން ހުންނެވިކަމަށް" ނާޝިޒު ވިދާޅުވި އެވެ.

ރައީސް ނަޝީދުގެ އަރިހުގައި އުޅުއްވާ ބޭފުޅުންނަށް ބަހުގެ ހަމަލާތަކެއް ދެމުން ނާޝިޒު ވިދާޅުވީ އެބޭފުޅުންވެސް އަބަދު ދައްކަވަނީ ކޮންމެވެސް ތަޅެއް އަޅުއްވައިގެން އުޅުއްވާ ވާހަކަ ކަމަށެވެ. އެހެންކަމުން ރައީސް ނަޝީދު ކުރައްވަން އުޅުއްވާ ކަމެއް އަންޑަސްޓޭންޑު ނުވާކަމަށް ނާޝިޒު ވިދާޅުވި އެވެ.

ރައްޔިތުންގެ މަޖިލީހުގެ ކޮމިޓީތައް ކުރިއަށް ނުގެންދެވި ހުއްޓިފައި އޮތީ އެމްޑީޕީއިން 13 މެމްބަރަކު ވަކިވުމާއި ގުޅިގެން ކޮމިޓީތަކުގައި މެމްބަރުން އެކުލެވޭ ގޮތަކާއިމެދު ސިޔާސީ ޕާޓީތަކުގެ މެދުގައި އެއްބަސްވުމަކަށް ނާދެވިގެންނެވެ. އެމްޑީޕީން ހުށަހަޅާ ގޮތަށް އިދިކޮޅަށް އެއްބަސްނުވެވޭނެކަމަށް ބުނާއިރު އިދިކޮޅުން ހުށަހަޅާ ގޮތަށް އެމްޑީޕީއަށްވެސް އެއްބަސް ނުވެވޭނެކަމަށް ބުނެ އެވެ.

ރައްޔިތުންގެ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލައެއް މަޖިލީހަށް ވައްދާފައި އޮތްއިރު ނައިބު ރައީސްގެ އިތުބާރު ނެތްކަމުގެ މައްސަލަ މާދަމާގެ ޖަލްސާއަށް ވަނީ އެޖެންޑާ ކޮށްފަ އެވެ.